iklan

HEADLINE, OÉ-CUSSE (RAEOA)

Xefe Governu husu Atoni-oan hamutuk ho Autoridade RAEOA dezenvolve Oé-cusse

Xefe Governu husu Atoni-oan hamutuk ho Autoridade RAEOA dezenvolve Oé-cusse

Primeiru-Ministru, Taur Matan Ruak, asina plaka projetu reabilitasaun estrada rurál iha aldeia Fatubijae, domingu (27/11). Imajen Tatoli/Abílio Elo Nini

OÉ-CUSSE, 27 novembru 2022 (TATOLI)—Primeiru-Ministru (PM), Taur Matan Ruak, husu ba populasaun sira iha Rejiaun Administrativa Espesiál Oé-cusse Ambeno (RAEOA) atu serbisu hamutuk ho Autoridade dezenvolve Oé-cusse sai hosi izolamentu.

“Ha’u hanesan Primeiru-Ministru, tinan ne’e mai hamutuk ho imi iha Oé-cusse, entaun enkoraja nafatin inan-aman sira atu serbisu hamutuk ho Autoridade RAEOA, ita-boot sira-nia Prezidente ema Oé-cusse oan, previleju boot ba imi no ba Oé-cusse oan bele lidera rasik nia rai moris fatin,” Xefe Governu hateten ámbitu inaugurasaun projetu reabilitasaun estrada iha suku Bobokase, sub-rejiaun Pante Makasar, Oé-cusse, domingu ne’e.

PM Taur haktuir, iha tinan hirak liubá, nu’udar Prezidente Repúblika, bainhira hala’o vizita iha Oé-cusse, komunidade fahe malu tanba grupu partidu oin-oin, unidade naksobu, no haluhan-an katak Oé-cusse hetan tratamentu espesiál, tanba ne’e persiza hamutuk.

“Partidu sira-nia funsaun boot iha tempu kampaña ba eleisaun, maibé iha loron baibain, imi persiza serbisu hamutuk ema ida de’it, enklave ida de’it no nasaun ida de’it, entaun presiza hamutuk atu luta ho serbisu maka’as atu ita sai hosi izolamentu ne’e,” nia fó hanoin.

Notísia relevante: PM inaugura projetu reabilitasaun estrada kilómetru 14 iha Pante Makasar

Xefe Governu fundamenta, kada tinan orsamentu ba rejiaun espesiál ne’e ho populasaun 80 resin liu fali munisipíu 12 hamutuk, tanba ne’e presiza aproveita ho di’ak.

“Ita-boot sira-nia osan liu, munisipíu 12 nia orsamentu la to’o millaun $80, maibé Oé-cusse nia osan ba tinan 2023 hamutuk millaun $120, ne’e ba tinan ida de’it. Orsamentu ne’e atu halo saida?, la’ós tanba imi polítika liu hanesan rai-boot, inan-aman preokupa, deputadu sira mós aprova orsamentu ne’e mós preokupa, sira-nia hanoin katak Oé-cusse nu’udar rai enklave ida iha Timor-Leste, nia labele izoladu, nia tenki sente katak rai-boot la haluha. Tanba ne’e tenke uza tempu didi’ak hanesan osan mean,” PM tenik.

Aleinde ne’e, PM husu ba Atoni-oan atu labele lakon oportunidade atu dezenvolve rasik rai, tanba ema ida sei la moris to’o tinan 200 resin.

“Kuandu ita-nia idade mais avansa ona, ita tenki halo buat ruma di’ak ba ita-nia jerasaun sira, liu-liu Oé-cusse oan tenki serbisu maka’as. Entaun ami espera iha rai-boot bele apreende buat barak hosi Oé-cusse, tanba iha ona mudansa ba infraestrutura atu muda povu sai hosi izolamentu,” nia katak.

Tuir Primeiru-Ministru, Oé-cusse Ambeno hetan tratamentu espesiál la’os ba ema ida de’it ka Autoridade sira mesak de’it, maibé ba povu tomak iha rejiaun ne’e, entaun nia husu Autoridade komunitária sira atu serbisu hamutuk ho populasaun atu promove liña koordenasaun ho Autoridade RAEOA. Hamutuk hodi rezolve problema bázika sira iha suku no hakbesik ba Autoridade hodi buka solusaun di’ak.

“Ida-ne’e maka presiza serbisu hamutuk, tanba ami iha rai-boot iha ne’ebá, imi mesak ho imi-nia Prezidente Oé-cusse oan, entaun problema saida mak akontese imi rasik mak tenke rezolve, mais kuandu la hamutuk, oinsá mak imi-nia rai Oé-cusse bele ba oin,” nia tenik.

Nune’e, Xefe Governu apela ba populasaun tomak to’o autoridade komunitáriu sira, tenki serbisu maka’as, haluha polítika kor partidu, serbisu hamutuk ho entidade sira hotu, atu nune’e dezenvolve Oé-cusse iha futuru bele sai referénsia ba Timor-Leste.

Serimónia inaugurasaun estrada rurál akompaña hosi Ministru Asuntu Parlamentár no Komunikasaun Sosiál,  Francisco Martins da Costa Pereira Jerónimo, Ministru Justisa, Tiago Sarmento, Deputadu balun, Xefe suku 18 no jestór sub-rejiaun Oésilo, Pássabe, Nítibe no Pante Makasar inklui komunidade lokál.

Jornalista   : Abílio Elo Nini

Editora        : Julia Chatarina

iklan
iklan

Leave a Reply

iklan
error: Content is protected !!