MANATUTO, 28 novembru 2022 (TATOLI)—Prezidente Repúblika (PR), José Ramos Horta, hateten nia parte orgullu ho progresu dezenvolvimentu iha Timor-Leste durante tinan 20 nu’udar Estadu Direitu Demokrátiku.
Notísia Relevante: Horta dezafia Autoridade Seguransa asegura prejunsaun inosénsia
“Ita orgullu ho ita-nia nasaun ida-ne’e, tinan 20 nia laran Timor la’o ba oin. Dala barak sé mak lakohi haree laiha buat ida, maibé sé mak haree ho matan bele haree progresu ne’ebé ita halo tinan 20 nia laran mak progresu materiál, infraestrutura, edukasaun no saúde,” PR Horta hateten liuhosi diskursu, iha ámbitu komemorasaun loron proklamasaun independénsia ba dala-47, iha suku Aiteas, postu administrativu Manatuto vila, munisípiu Manatuto, segunda ne’e.
Nia akresenta, Timor-Leste sai ona nu’udar Estadu investidór iha rai-seluk, Fundu Petrolíferu iha ekonomia AmeriKana.
“Ita-nia Fundu Petrolíferu sosa buat ne’ebé ita bolu bons, notas promissórias iha ekonomia Europa nian barak. Ne’ebé Timor-Leste ho Fundu Soberanu ita-nian mai hosi Mina, ita investidór iha rai-laran tanba investe iha Orsamentu Jerál Estadu (OJE), investimentu mós iha rai-li’ur no sei aumenta liután investimentu ida-ne’e liu-liu hamutuk ho ita-nia viziñu Indonézia no Austrália, ne’e mak prioridade absuluta ba ita,” nia dehan.
Maske nune’e, Xefe Estadu husu atu halo di’ak no barak liután liu-liu ba labarik kiik no inan sira, ida-ne’e mak prioridade absoluta oinsá hamate ki’ak iha Timór no sub-nutrisaun.
Biban ne’e, Prezidente Repúblika, agradese ba Povu Manatuto tanba simu ona ema hotu-hotu iha Manatuto ho di’ak, no agradese mós ba parte hotu-hotu ne’ebé kontribui hodi realiza komemorasaun loron proklamasaun independénsia iha Manatuto ho di’ak mezmu hasoru difikuldade oioin.
Iha ámbitu ne’e, Atribui mós sertifikadu títulu na’in ba rai ne’ebé reprezenta hosi benefisiáriu Uma Kbiit Laek na’in-ida.
Atividade ne’ebé realiza hafoin seremónia hasa’e banderia mak aprezentasaun moradór sira hosi postu Administrativu neen munisípiu Manatuto hanesan postu administrativu Laleia, Laclo, Laclubar, Soibada, Natarbora no Manatuto Vila, tebedaí no baku babadok, no kompetiasaun sa’e bua.
Jornalista : Antónia Gusmão
Editór : Cancio Ximenes
