Ministru Longuinhos louva estudante feto Bobonaro dada-sa’e bandeira RDTL
BOBONARO, 28 novembru 2022 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, sente kontente no louva estudante feto iha Bobonaro ne’ebé fiar-an sai korpu isár bandeira hodi kesi no dada-sa’e Bandeira nasionál Repúblika Demokrátika Timore-Leste iha komemorasaun loron prokolamasaun independénsia 28 novembru ba dala-47.
Tuir governante ne’e hateten, kada tinan iha nivél nasionál no munisípiu bainhira realiza isár bandeira ba serimónia nasionál, sira maiória mane de’it mak sai korpu isár bandeira maibé tinan ne’e diferensa uitoan liu-liu iha munisípiu bobonaro tanba feto mós hahú ona hola parte.
Notísia Relevante: Funsionáriu Autoridade Bobonaro sai vensedór kompetisaun marsa orden unida
“Ha’u hanoin imbolvimentu feto iha isár Bandeira, ohin, ita-bot sira haree maiória feto. Ne’e ha’u orgullu loos no louva ba ha’u-nia alin estudante sira, maibé se atu aumenta di’ak liután involvimentu feto, tanba ema dehan feto forte nasaun forte,” Governante ne’e hateten ba jornalista sira, hafoin sai inspetór da serimonia Isár Bandeira iha Kampu Futeból Maliana, Bobonaro, segunda ne’e.
Sorin seluk, Prezidente Autoridade Munisípiu Bobonaro, Ernesto de Oliveira Barreto, sente onradu tanba korpu isár Bandeira liu-liu atu kesi no dada sa’e Bandeira RDTL tinan ne’e iha mudansa uitoan.
“Ita haree isár bandeira ne’e baibain ne’e mane de’it, maibé ohin ne’e feto de’it. Ne’ebé, ha’u fó parabéns ba sira tanba sira-nia treinamentu durante ne’e kapaas tebe-tebes, to’o ohin loron 28 novembru sira implementa mós kapaas loos. Ne’ebé, dala ida tán, ha’u agradese ba sira-nia servisu, ba oin presiza aumenta feto barak liután,” nia dehan,
Atividade komemorasaun loron 28 novembru hahú tuku 09h00 dadeer ho serimónia isár bandeira nasionál, ne’ebé akompaña ho parada estudante kuaze 100 hosi Eskola Don Martinho da Costa Lopez, Sentru Aprendizajen Informasaun Eskolár (CAFÉ, sigla portugés) Maliana no Eskola Tékniku Vokasionál Informátika no seluk tan, ho formatura hosi Polísia Nasionál Timor-Leste (PNTL) Komandu munisípiu Bobonaro, Bombeiru, Seguransa Sivil, funsionáriu servisu munisipál, inklui ekipa hasa’e bandeira hosi suku Hitu no estudante Estájiadu Universidade Nasionál Timor Lorosa’e (UNTL), IOB no UNDIL
Aleinde ne’e, membru Governu prezide Um Minuto de Silêncio ba eroi sira, hafoin loke gravasaun audiu textu Proklamasaun Independénsia ne’ebé lee hosi Proklamadór, Fransisco Xavier do Amaral no tama kedas ho diskursu Prezidente Repúblika, José Ramos Horta, ne’ebé lee hosi Ministru Ensinu Superior Siénsia no Kultura, Longuinhos dos Santos.
Hafoin ramata, kontinua ho animasaun drum band hosi eskola Tekniku Vokasionál númeru II Malibaca Yamato Maliana kuaze minutu rua (2), ne’ebé iha ámbitu ne’e estudante sira hatudu kreatividade Dansa.
Alende ne’e Komunidade sira hosi suku hitu sei tebes dahur iha kampu Laran no iha mós Jogu Tradisionál Bola Guling.
Iha parte lorokraik, hatun Bandeira Nasionál no Komisaun Organizadora komemorasaun 28 Novembru munisipiu Bobonaro mós sei entrega premiu ba Fúnsionariu Públiku sira-ne’ebé sai manán-na’in ba kompetisaun Sertame Funsionariu Públiku no Kompetisaun Marsa Orden Unida.
Serimónia ne’e partisipa hosi Sekrtáriu Autoridade munisípiu Bobonaro, Julio Carvalho Caero, Eis Prezidente Autoridade Bobonaro, Jeferino dos Santos, Komandante Polísia Komandu munisípiu Bobonaro, Superintendente Antoninho Mauluta, Eis deputadu Veteranu no Veterana, Administradór postu, kargu xefia servisu munsipál no sektorál, autoridade lokál, membru FALINTIL-Forsa Defeza Timor-Leste (F-FDTL) no PNTL inklui komunidade suku hitu iha postu administrativu Maliana.
Notísia Relevante: Funsionáriu Autoridade Bobonaro sai vensedór kompetisaun marsa orden unida
Jornalista : Sérgio da Cruz
Editór : Cancio Ximenes
