BOBONARO, 24 novembru 2022 (TATOLI) – Funsionáriu públiku hosi Autoridade Munisípiu Bobonaro, kinta ne’e sai vensedór ba kompetisaun marsa orden unida iha ámbitu komemorasaun loron Proklamasaun Independénsia, 28 novembru ba dala-47.
Enkuantu vensedór daruak okupa hosi funsionáriu diresaun servisu munisipál Obra Públika, terseiru lugár hosi servisu munisipál água no saneamentu ambiente (SMASA), kuartu klasifikadu diresaun servisu munisipál Ministeriu Solidariedade Sosiál no Inkluzaun (MSSI) no kintu lugár okupa hosi diresaun servisu edukasaun munisipál.
Notísia relevante: Autoridade Bobonaro realiza kompetisaun sertame ba funsionáriu públiku
Kompetisaun ne’e rasik avalia hosi ekipa juri na’in-tolu, komposta hosi prezidente juri, komandante PNTL Bobonaro, Superintedente Antoninho Mauluta, Adjuntu Komandante Komandu Polísia munisípiu, Asistente Superintedente Fásio de Jesus Lima no juri datoluk Komandante Bombeiro munisípiu Bobonaro.
Prezidente Komisaun Organizadora Komemorasaun 28 novembru, munisípiu Bobonaro, Crispim Moniz, hateten atividade ne’e foin primeira vez hala’o iha munisípiu Bobonaro ho objetivu atu familiariza funsionáriu públiku adapta sistema orden unida iha kualkér atividade nasionál sira.
“Atu konfirma ba ita hotu katak, saida maka ohin ita halo saida hanesan esperiénsia prinisipál ba ita. Hosi ami komisaun organizadora, liuhosi atividade sira hanesan ne’e ami iha hanoin ida katak ba oin ami sei hato’o pedidu ba PNTL atubele fó treinu kada eskola atu habelar sistema formatura ida-ne’e iha kada eskola,” nia ko’alia iha kampu futeból Maliana.
Sekretáriu Autoridade Munisípiu Bobonaro, João do Carmo de Fátima, agradese ba komisaun organizadora bele iha inisiativa loke kompetisaun ne’e ba funsionariu públiku sira hodi selebra loron importante ne’e.
“Ha’u kontente tebes ho atividade ne’e, tanba ita-nia funsionáriu públiku sira la’ós mákina estadu de’it, maibe sira hanesan servidór hodi nafatin iha lealdade nune’e bele hala’o kna’ar no funsaun tuir lei funsaun públika nian,” nia katak.
Prezidente Juri atuál Komandante PNTL Munisípiu Bobonaro, Superintendente Antoninho Mauluta, agradese no parabeniza funsionáriu sira-ne’ebé sai ona vensedór iha kompetisaun ne’e, maske iha aprezentasaun sei iha naksalak balun no la tuir regra orden unida.
Maibé importante liu ba tenke berani atu halo saida de’it tuir regra no lei haruka hodi sai lalenok ba funsionáriu sira seluk no ba jerasaun foun.
“Ita tenke iha prinsípiu saida mak ita bele halo, saida mak hakarak soke ita soke de’it lalika ta’uk tanba ita hakarak hadi’a ita tenke berani,” nia hateten.
Iha kompetisaun ne’e vensedór dahuluk hetan prémiu hanesan sertifikadu, livru funsaun públika ho osan $100, segundu lugár hetan sertifikadu livru funsaun públika osan $75 no terseiru lugár simu sertifikadu,livru funsaun públika ho osan $25. Prémiu sira-ne’e sei fahe hafoin enseramentu serimónia isar bandeira nasionál 28 novembru parte lokraik.
Notisia relevante: Klubu 16 kompete liga voleiból terseira divizaun iha Bobonaro
Jornalista : Sérgio da Cruz
Editór : Evaristo Soares Martins
