iklan

BOBONARO, HEADLINE, MUNISÍPIU, POLÍTIKA

Autoridade Bobonaro realiza kompetisaun sertame ba funsionáriu públiku

Autoridade Bobonaro realiza kompetisaun sertame ba funsionáriu públiku

Autoridade munisípiu Bobonaro realiza kompetisaun sertame funsionáriu públiku iha ámbitu komemorasaun 28 novembru ba dala-47. Imajen Tatoli/Sérgio da Cruz.

BOBONARO, 22 novembru 2022 (TATOLI) – Autoridade munisípiu Bobonaro, tersa ne’e, realiza kompetisaun sertame funsionáriu públiku ba grupu 12 hodi komemora loron Proklamasaun Independénsia Repúblika Demokrátika Timor-Leste, 28 novembru ba dala-47 iha tinan ne’e.

Grupu 12 ne’e mai hosi funsionáriu diresaun servisu munisipál no delegasaun territoriál sira iha kapitál Maliana no postu administrativu sira.

Iha abertura kompetisaun ne’e grupu haat mak sei kompete iha tempu dadeer nian, komposta hosi grupu dahuluk mak Protesaun Sivíl, grupu daruak mak Komisaun Nasionál ba Eleisaun (CNE, sigla portugés), datoluk Diresaun Servisu Agrikultura no daahat Administrasaun Finansa autoridade munisípiu Bobonaro.

Notísia relevante: Autoridade Bobonaro apela komunidade hasa’e bandeira RDTL iha uma oin

Prezidente Autoridade Munisípiu Bobonaro, Ernesto de Oliveira Barreto, hateten atividade ne’e foin realiza iha munisípiu Bobonaro hanesan meiu ida atu kapasita funsionáriu públiku.

“Ha’u hanoin atividade ne’e importante la halimar, tanba ita la’ós haree de’it ba atividade dezenvolvimentu fízika, maibé ita mós tenke haree ba atividade dezenvolvimentu ema. Ida-ne’e kapasita ba ita-nia funsionáriu tomak,” nia ko’alia iha salaun administrasaun munisípiu Bobonaro.

Nia agradese ba Komisaun Organizadora tanba bele enkaixa ona sertama funsionáriu públiku iha ámbitu komemorasaun loron istóriku ne’e.

“Ha’u esperu atividade ne’e la’ós para de’it ohin loron, maibé ba oin ita sei hala’o di’ak liután, ita sei kontinua dezenvolve, liuliu iha loron funsaun públika ita sei hala’o,” nia katak.

Prezidente Komisaun Organizadora ba komemorasaun loron 28 novembru, munisipiu Bobonaro, Crispim Moniz, informa, kompetisaun ne’e sei foka liu ba matéria sira kona-bá lei funsaun públika, Konstitusaun RDTL no istória Timor-Leste, liuliu dekretu lei ne’ebé regula kompeténsia servisu munisipál sira.

“Ita hanesan funsionáriu públiku, liuliu destakadu iha munisípiu, atubele hatene saida mak deskreve iha dekretu lei númeru 3/2016 tanba ida-ne’e maka fasparte kompeténsia saida mak atribui ba kada servisu munisipál sira,” nia akresenta.

Kompetisaun ne’e rasik sei avalia hosi juri na’in-tolu komposta hosi avaliadór primeiru, Gisela Pires atuál Diretora Apoiu Servisu Organizasaun Naun Governmanetál (ONG) lokál Munisípiu Bobonaro.

Avaliadór daruak mak Donata Marques atuál xefe departamentu rekursu umanu administrasaun munisipiu Bobonaro no avaliadór datoluk mak Domingos da Costa reprezenta servisu edukasaun munisípiu Bobonaro.

Enkuantu kempetitór sira-ne’ebé hetan mellora kualifikadu iha kompetisaun ohin loron sei hakat ba faze semi-finál no finál ne’ebé sei realiza aban, kuarta (23/11) no grupu ne’ebé sai vensedór u to’o terseiru sei hetan prémiu inklui osan.

Notísia relevante: Bobonaro sei komemora loron proklamasaun independénsia ho atividade oioin

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!