iklan

HEADLINE, MUNISÍPIU, VIQUEQUE

MOP Viqueque komunika ona parte nasionál rezolve ponte Buanurak kotu

MOP Viqueque komunika ona parte nasionál rezolve ponte Buanurak kotu

Kondisaun ponte Buanurak Viqueque ne’ebé kotu, segunda (28/11). Imajen Tatoli/Vitorino Lopes da Costa.

VIQUEQUE, 28 novembru 2022 (TATOLI)—Servisu Ministériu Obra Públika (MOP) munisípiu Viqueque komunika ona ho MOP sentrál atu rezolve ponte Buanurak baliza entre postu Ossu no postu Viqueque Vila, ne’ebé kotu iha domingu (27/11) maizumenus tuku 11:20.

Pasajeiru sira lori sasán hakat mota tanba ponte Buanurak kotu, segunda (28/11). Imajen Tatoli/Vitorino Lopes da Costa

Tuir Diretór Servisu MOP Viqueque, ho kondisaun ne’e difikulta movimentu ema no transporte, nune’e pasajeiru sira horikalan toba de’it iha ponte tanba mota tun halo pasajeiru labele hakur mota.

“Kona-ba ponte Buanurak kotu horiseik ne’e, ha’u informa ona ba ministériu hodi koordena ho empreza COVEC tanba ministériu mak bele halo koordenasaun hodi kria dalan alternativa ba transporte públiku sira. COVEC maka daudaun kaer hela obra estrada ne’e, nune’e sira maka bele halo dalan alternativa,” Diretór Servisu MOP Viqueque informa ba Agência Tatoli, iha postu Viqueque Vila, segunda ne’e.

Nune’e, Diretór ne’e espera empreza responsável bele kria dalan alternativa hodi fasilita movimentu pasajeiru sira.

Notísia relevante: MOP Viqueque koordena parte nasionál hodi normaliza ponte Uani-uma

Komunidade ajuda família matebian lori kaixaun ho mate-isin hakat mota, segunda (28/11). Imajen Tatoli/Vitorino Lopes da Costa

Iha fatin hanesan, família mate-isin hosi postu Uatulari, Martina Fernandes, dehan, horiseik lori mate-isin, iha tuku 15:00 lorokraik to’o ponte maibé ambulánsia labele liu ponte tanba kotu.

“Ami horiseik lori mate-isin hosi Baucau atu bá Uatulari, maibé ami to’o iha ne’e ponte kotu, nune’e ami ho mate-isin iha de’it mota sorin tanba mota mós tun boot. Nune’e ohin ami husu fali ámbulansia hosi Viqueque maka simu iha mota sori no ami husu ajuda ba komunidade iha ne’e maka lori mate-isin hakur ba mota sorin,” nia haktuir.

Nune’e mós, pasajeiru, Satornino Amaral, haktuir, horiseik mai hosi Dili no agora atu filafali bá Dili maibé ladi’ak.

“Ida-ne’e presiza medida intervensaun ruma hodi ajuda komunidade nia movimentu. Ponte ne’e kotu fó impaktu ba komunidade, horikan ne’e emi toba iha ne’e no to’o agora sei iha ne’e,” nia hato’o.

Komunidade lori motór hakat mota tanba ponte Buanurak kotu, segunda (28/11). Imajen Tatoli/Vitorino Lopes da Costa

Satornino Amaral, husu autoridade no ministériu relevante sira tenke tau-atensaun urjente hodi labele perturba movimentu pasajeiru.

Tuir observasau Agência Tatoli iha terrenu, nota katak komunidade oras ne’e nakonu iha ponte Buanurak hodi hein autoridade sira bele rezolve.

Komunidade hulan kaixaun ho mate-isin ida hakur ba mota sorin hodi tau iha ámbulasia inklui abitante balun hiit motór liu mota.

Daudaun ne’e empreza COVEC mobiliza ona eskavatór iha mota ninin hodi kria dalan alternativa ba transporte no ema la’o ain sira.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!