iklan

HEADLINE, MUNISÍPIU, VIQUEQUE

Autoridade husu MJ estende atendimentu trata dokumentu idozu iha Uatucarbau

Autoridade husu MJ estende atendimentu trata dokumentu idozu iha Uatucarbau

Administradór postu Uatucarbau, Alfredo dos Santos, akompaña ho funsionáriu administrasaun postu no idozu balun, halo konfénsia imprensa hodi husu estende tempu atendimentu trata dokumentu ba idozu, iha postu Uatucarbau, tersa (29/11). Imajen Tatoli/Vitorino Lopes da Costa

VIQUEQUE, 29 novembru 2022 (TATOLI)—Administradór postu Uatucarbau, Alfredo dos Santos, husu ba Diresaun Jerál Servisu Rejistu Notariadu (DJSRN) Ministériu Justisa (MJ) atu estende prosesu atendimentu trata sertidaun moris no Billete Identidade (BI) ba idozu.

DJSRN lansa rejista integrada online móvel hodi atende trata dokumentu ba idozu iha postu Uatucarbau, munisípiu Viqueque durante loron-12 nia laran, hahú iha loron 20 novembru to’o 02 dezembru, maibé tanba kondisaun ahi la estável difikulta atendimentu.

“Foin lalais eletrisidade mate durante loron-tolu, nune’e ferik no katuas sira toba de’it iha postu hodi halo sira-nia dokomentu. Tanba ne’e, ami husu ba Ministériu Justisa atu estende tan ekipa notariadu sira-nia tempu servisu loron-lima tanba idozu hosi suku rua maka seidauk halo hotu,” Administradór postu Uatucarbau, hateten liuhosi konferénsia imprensa, iha postu Uatucarbau, tersa ne’e.

Notísia relevante: MJ lansa integrada online sertidaun moris no BI ba idozu Uatucarbau

Autoridade lokál ne’e sente triste tanba idozu sira la’o dook mai halo dokumentu, maibé seidauk konsege hetan atendimentu tanba ahi mate, nune’e sira toba de’it iha postu okos.

“Ami husu ba Eletricidade de Timor Leste, Empreza Públika (EDTL, E.P) tenke serbisu ho di’ak hodi kontrola liña eletrisidade sira tanba oras ne’e sira kliente kumpre selu, maibé eletrisidade mate lakan halo komunidade laran triste tebes,” nia akresenta.

Iha fatin hanesan, Reprezentante Xefe suku Irabin de Baixu, Mateus da Silva Gaspar, haktuir, idozu hosi suku ne’e iha 200 resin maka seidauk trata dokumentu tanba ahi eletrisidade mate.

“Idozu sira labele obriga la’o to’o postu Uatucarbau, tanba ne’e husu Ministériu Justisa atu estende tan servisu hodi bele halo atendimentu trata dokumentu ba idozu sira. Idozu sira mai hein de’it iha ne’e kuaze loron-tolu seidauk halo sira-nia dokumentu tanba ahi eletrisidade mate,” nia hato’o.

Nune’e mós, Diretór EDTL, E.P, Ermesto Sarmento, informa, ahi eletrisidade mate tanba impaktu hosi udan no ai tohar hodi estraga fiu.

“Eletrisidade foin lalais mate tanba ai maka monu iha fiu leten ne’ebé fiu monu iha parte Adarai, suku Fatudere, postu administrativu Viqueque Vila, maibé tékniku sira hadi’a ona,” nia informa.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!