DILI, 29 novembru 2022 (TATOLI)—Estudante 20 iha Eskola Ensinu Sekundáriu Tékniku Vokasionál (ESTV) Hera tuir prova aptidaun profisionál (PAP) tanba valór la sufisiente.
Diretór Eskola ESTV Hera, António Pinto, informa, estudante 20 ne’ebé ninia valór la sufisiente iha PAP, daudaun kumpre filafali obrigasaun hodi tuir fali ezame, tanba inisiativa ne’e nu’udar rekursu ikus atu deside.
“Eskola ne’e iha prosesu rua ne’ebé estudante sira tenke kumpre, ida maka prova aptidaun profisionál no ezame nasionál, maibé prova aptidaun profisionál sai sasukat ida atu deside estudante ne’e liu ka lae,” Diretór hateten ba Agência Tatoli, via telefónika, tersa ne’e.
Notísia relevante: MEJD sei anunsia rezultadu ezame nasionál iha 09 dezembru
Nia dehan, bainhira estudante tuir PAP mak hetan valór ladi’ak ka la sufisiente, maka iha ezame nasionál bele hetan valór di’ak no sai primeiru klasifikasaun mós sei la pasa. Enkuantu, tuir PAP ho valór di’ak, maibé iha ezame nasionál valór ladi’ak maka kontinua aprovadu.
“Estudante iha eskola tékniku molok atu tuir ezame nasionál, sira tenke tuir uluk prova aptidaun profisionál no halo estájiu, hafoin ne’e ramata mak hakerek relatóriu aprezenta mai eskola, bainhira hetan ona konsiderasaun maka foin bele tuir prova aptidaun profisionál liuhosi aprezentasaun matéria sira,” nia akresenta.
Hosi PAP bainhira konsidera finaliza ho di’ak maka la presiza hein tan rezultadu ezame nasionál mós bele hatene ona sé mak liu no sé mak la liu.
“Tanba ne’e, eskola sei fó nafatin oportunidade ba estudante 20 atu mai hadi’a sira-nia valór hodi bele hetan oportunidade iha futuru. Ita-nia estudante hirak ne’e la’ós estudante baruk ten, sira mesak estudante ativu, maibé dala ruma sira maka ladún konsentra didi’ak, tanba ne’e halo sira monu iha prova aptidaun profisionál. Ita hein katak iha prova aptidaun profisionál segundu xamada, sira bele hatudu rezultadu di’ak hodi deside sira-nia susesu,” nia dehan.
Estudante 20 hosi Eskola TEKVOK Hera ne’ebé rekupera fali sira-nia valór mai hosi estudante departamentu komérsiu no estudante hosi departamentu kontabilidade.
Nune’e, sei rona uluk rezultadu PAP hafoin maka sei rona fali rezultadu hosi ezame nasionál nian.
Jornalista : Tomé Amado
Editora : Julia Chatarina
