Top

Gerda husu partidu polítika tau polítika seguransa aihan-nutrisaun sai prioridade

United Nation Assistant Secretary-General Coordinator, Scaling Up Nutrition (SUN), Gerda Verburg. Imajen Tatoli/Francisco Sony

DILI, 29 novembru 2022 (TATOLI)-Asistente Sekretáriu Jerál Organizasaun Nasaun Unida (ONU) no Koordenadora Global Scaling Up Nutrition (SUN), Movement, Gerda Verburg, tersa ne’e, hala’o enkontru ho Prezidente Parlamentu Nasionál, Aniceto Longuinhos Guterres Lopes, akompaña hosi Vise Prezidente PN no Xefe Bankada Parlamentár.

Notísia Relevante: Asistente Sekretáriu Jerál ONU-koordenadora SUN Gerda Verburg vizita TL

“Ha’u ko’alia ona ho ita-boot sira-nia Parlamentu atu bele tau polítiku dezenvolve seguransa aihán no nutrisaun sai prioridade polítika ba partidu hotu-hotu (iha Timor-Leste TL) tanba ida ne’e importante ba dezenvolvimentu ita-nia ema, kapitál umanu no dezenvolvimentu ekonómiku Timor-Leste nian,” Koordenadora Global Scaling Up Nutrition ne’e hateten ba jornalista sira hafoin ramata enkontru ho PPN iha sala konferénsia PN.

Durante sorumutu ho Prezidente Parlamentu Nasionál, Vise Prezidente Parlamentu ho lidér bankada balun ko’alia foku tópiku importante tebes kona-ba seguransa aihan no nutrisaun.

Tanba depois Independénsia ne’e demokrásia, pás no estabilidade tuir kedas ida-ne’e mak dezenvolvimentu ekonómia sosiál liu-liu dezenvolvimentu iha ema nia fíziku no nia kakutak ne’e importante tebe-tebes.

“Ami ko’alia kona-ba importánsia atu investe iha ema liu-liu iha labarik sira hahú hosi nia loron moris primeiru nian. No ami mós fó importánsia kona-ba susu-been fó susu ba labarik nian no Parlamentu konkorda tebe-tebes atu apoiu lei kona-ba susu-been fórmula ka susu-been substituisaun sira,” nia hateten.

Nune’e mós PN apoiu tebe-tebes kona-ba lei fortifikasaun aihan hanesan foos, trigu, mina tein no seluk tan, nune’e hahán sira-ne’e iha kontein vítamina ona ne’ebé importante ba dezenvolvimentu fíziku no kakutak ema timoroan nian.

Gerda Verburg hateten, tinan oin Timor-Leste sei hasoru eleisaun parlamentár espera hafoin ne’e nutrisaun no seguransa aihan bele sai nafatin hanesan prioridade ba partidu polítiku no Governu oin mai.

Vise Prezidente Parlamentu Nasional, Maria Angelina Sarmento, hateten sorumutu ne’e importante tebes atu promove nafatin seguransa aihan iha rai-laran tanba kestaun má nutrisaun eziste nafatin iha rai-laran.

“Ita tenke promove aihan sira-ne’ebé mak iha nutrisaun di’ak, la’ps  aihan kontamidau ona hodi lori moras ba ema-nia saúde, tanba ne’e ohin sira mai husu atu programa ida-ne’e sai importante tantu agora no Governu ne’ebé sei mai,” nia dehan.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!