iklan

HEADLINE, MUNISÍPIU, VIQUEQUE

Konstrusaun pré-eskolár Dara-Loi Uatulari atinje ona 50%

Konstrusaun pré-eskolár Dara-Loi Uatulari atinje ona 50%

Prosesu kontrusaun pré-eskolár Dara-Loi iha suku Matahoi liuhosi projetu komunitáriu, tersa (29/11). Imajen Ttaoli/Vitorino Lopes da Costa

VIQUEQUE, 29 novembru 2022 (TATOLI)—Progresu konstrusaun pré-eskolár Dara-Loi, iha suku Matahoi, postu Uatulari, munisípiu Viqueque, liuhosi programa projetu komunitáriu daudaun ne’e atinje ona 50%.

“Tuir loloos, konstrusaun pré-eskolár hotu ona maibé ita-nia badaen ne’ebé haree ba obra konstrusaun ida-ne’e halo fali sira-nia atividade privada kuaze semana ida resin no la halo serbisu. Horiseik maka badaen sira fila mai halo sinta jerál ne’ebé agora atinje ona 50%,” Prezidente Konsellu País Administrasaun (KPA) no atuál Xefe suku Matahoi, António Amaral, hateten iha fatin konstrusaun pré-eskolár, suku Matahoi, tersa ne’e.

Notísia relevante: Reabilitasaun eskola lima projetu komunitáriu Viqueque finaliza ona

Tuir Autoridade Komunitáriu ne’e, empreza fornesedór materiál konstrusaun horiseik tula ona semente hodi halo konstrusaun eskola.

“Ha’u sei orienta nafatin badaen sira hodi aselera serbisu ida-ne’e, nune’e bainhira tama fulan-dezembru bele finaliza konstrusaun. Nune’e, tinan oin estudante sira bele utiliza edifísiu foun,” nia akresenta.

Dezafiu ne’ebé grupu komunitáriu responsável projetu hasoru maka orsamentu kiik, tanba ne’e labele selu ema hodi tesi ai no halo aldame atu badaen sira uza ba konstrusaun. Pre-eskolár Dara-Loi konstrui sala tolu ho totál kustu $28.999,75.

Iha fatin hanesan, Reprezentante Diretór Edukasaun munisípiu Viqueque, Bernardo Fernandes, husu badaen sira hodi aselera prosesu konstrusaun, nune’e tinan oin estudante sira bele uza.

“Ha’u husu responsável sira tenke aselera prosesu konstrusaun ida-ne’e. Tuir loloos konstrusaun ne’e hotu iha fulan-novembru, maibé oras-ne’e seidauk finaliza. Oportunidade ne’e ha’u husu ba sira atu aselera serbisu,” nia tenik.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!