Ministru Longuinhos husu Bobonaro oan kria unidade kontribui ba prosesu dezenvolvimentu
BOBONARO, 29 Novembru 2022 (TATOLI)-Ministru Ensinu Superiór, Siénsia no Kultura, Longuinhos dos Santos, husu Bobonaro oan sira atu kria unidade iha idak-idak nia fatin nune’e bele kontribui ideia iha prosesu dezenvolvimentu nasionál.
Governante ne’e subliña, independénsia Timor-Leste hanesan prezente ida-ne’ebé eroi Francisco Xavier do Amarál no Nicolau Lobato no sira seluk husik ba povu.
Maibé hafoin konkista independénsia, eroi sira-nia esperansa maka tenke liberta povu hosi kiak no mukit.
Ministru ne’e haklaken, joven mak sai hanesan pilár importante ba futuru rai ida+ne’e ninian, kuandu unidade, sai ida de’it maka dezenvolvimentu mais fasil.
Notísia relevante: Ministru Longuinhos louva estudante feto Bobonaro dada-sa’e bandeira RDTL
“Hau hanesan Bobonaro oan ida hamutuk ho sira kleur iha-ne’e apela ba joven sira hotu tenke unidade, sai ida de’it no halakon buat ida-ne’ebé maka krime ne’ebé maka desvaloriza, entaun ita hamutuk ida de’it atu lori dezenvolvimentu ba futuru ne’ebé maka prósperu,” nia informa ba Jornalista sira, iha kampu Futeból Maliana, hafoin sai inspetor serimóiania komemorasaun 28 Novembru ba dala-47 iha munisípiu Bobonaro, segunda ne’e.
Prezidente Autoridade Munisípiu Bobonaro, Ernesto de Oliveira Barreto, agradese ba komunidade sira-ne’ebé partisipa másimu iha komemorasaun loron 28 novembru tinan ne’e.
“Hau husu ba komunidade sira hotu, iha komemorasaun loron importante sira tuir mai, tenke partisipa másimu nafatin, atu nune’e bele rame liután, tanba serimonia sira ne’e sei sai iha televizaun no ema hotu haree, liuliu nasaun viziñu Indonézia,” Ernesto apela.
Notísia relevante: Governu atribui sertifikadu títulu na’in ba rai iha Bobonaro
Jornalista: Sérgio da Cruz
Editór: Evaristo Soares Martin
