iklan

HEADLINE, MUNISÍPIU, VIQUEQUE

Abitante suku Irabin de Cima enfrenta difikuldade asesu pulsa pré-pagu eletrisidade

Abitante suku Irabin de Cima enfrenta difikuldade asesu pulsa pré-pagu eletrisidade

Xefe suku Irabin de Cima, Lino Martins. Imajen Tatoli/Vitorino Lopes da Costa

VIQUEQUE, 30 novembru 2022 (TATOLI)—Abitante hosi suku Irabin de Cima, postu administrative Uatucarbau, munisípiu Viqueque, daudaun ne’e asesu ona bee-moos maibé hasoru difikuldade asesu pulsa pré-pagu eletrisidade.

“Ami agradese ba Programa Nasionál Dezenvolvimentu Suku (PNDS) ne’ebé dada ona bee-moos hosi bee-matan lrabere, maibé ami hasoru difikuldade pulsa eletrisidade tanba bomba uza kontadór ne’e han pulsa maka’as liu,” Xefe suku Irabin de Cima, Lino Martins, informa iha postu Uatucarbau, kuarta ne’e.

Nune’e, Autoridade komunitária ne’e husu Governu hodi labele uza pré-pagu.

“Komunidade laiha osan hodi sosa pré-pagu, maski bee iha ona maibé komunidade labele uza loron-loron. Tanba ne’e, ami husu Governu koordena ho Eletricidade de Timor-Leste, Empreza Públika (EDTL, E.P) hodi labele uza pré-pagu,” nia akresenta.

Lino Martins relata, bainhira halo moris bee presiza pulsa, enkuantu abitante sira laiha kbiit atu sosa.

“Bainhira ami loke bomba oras ida nia laran, bele han ona pulsa kuaze $4. Ida-ne’e ami kbiit finanseiru laiha hodi sosa pulsa. Ho ida-ne’e ami hakarak husu ba EDTL, E.P, bee ne’ebé uza ba públiku nian, se bele labele uza pré-pagu,” nia tenik.

Notísia relevantePNDS hahú dada bee-moos ba abitante iha Irabin de Cima

Autoridade suku ne’e haktuir foin lalais PNDS apoia osan $100 hodi sosa pulsa maibé agora hotu ona, nune’e bainhira uza bee ba atividade iha suku laran, autoridade sira tau osan hamutuk mak foin sosa pulsa hodi loke bee.

Xefe suku Irabin de Cima hato’o ona kestaun ne’e ba Administradór Uatucarbau hodi fó hatene ba EDTL, E.P maibé seidauk iha resposta ruma.

Kanalizasaun bee ba suku Irabin de Cima hetan apoiu orsamentu hosi Governu Austrália hamutuk $31.884,17, enkuantu sosa materiál bee hetan apoiu hosi FSTI.

Bee-moos ne’e benefisia abitante aldeia lima iha suku lrabin de Cima, ho totál populasaun 1.000 resin hosi uma-kain purvolta 573.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!