BOBONARO, 30 Novembru 2022 (TATOLI)-Administradór postu administrativua (APA) Lolotoe, munisípiu Bobonaro, Casemiro Ferreira Bernardo, kontaktu ona Institutu Jestaun Ekipamentu, Institutu Públiku (IGE,I.P sigla portugés) atu halo normalizasaun estrada xubida iha aldeia Ozo, suku Lontas ne’ebé grave kauza hosi rai-halai hafoin akontese udan-boot iha semana kotuk.
Notísia relevante: Rai halai rezulta estrada Ozo Liga ba postu Lolotoe no Covalima grave
“Ha’u nudar autoridade lokál postu ninian, durante ne’e ha’u hatama ona mós iha mídia, no mos hato’o ona mai prezidente autoridade, depois ha’u liga ona ho IGE ne’ebé koloka iha Lolotoe,” nia informa ba Jornalista Tatoli iha administrasaun munisípiu Bobonaro, kuarta ne’e.
Casemiro haktuir, iha komunikasaun ne’e parte IGE preparadu atu halo intervensaun urjénsia, maibé seidauk bele mobiliza ekipamentu pezadu hosi Lolotoe Vila ba iha Ozo, tanba dalan parte Deudet nianbkondisaun grave.
“Ohin katuas lia-na’in Deu-det sira tuur hamutuk atu halo hela kultura, depois halo kultura tiha mak sira bele la’o iha estrada ida raut rai-henek fatin ne’e, rai ne’e lulik eksavator labele liu iha fatin ne’e, tanba xefe ekipa IGE hosi nasionál mós sei tún mai,” nia hateten.
Autoridade Postu ne’e subliña, provizóriu transporte públiku no privadu labele ultrapasa, maibé bele liu fali iha dalan parte Atus, suku Gidapil ninian.
Maibé ba ne’e komunidade sira-ne’ebé uza motorizada bele movimenta hosi kapitál Maliana ba postu administrativu Lolotoe.
“Hau bele dehan só ema ne’ebé barani maka bele liu, kuandu la brani tenke selu komunidade sira $1 ka $2. Ha’u rasik mós horisehik liu, ha’u selu ba ema hulan motorizada mai to’o iha Legem, mak foin bele mai Maliana, tanba estrada ne’e grave loos ona,” nia dehan.
Tuir dadus estatístika munisípiu Bobonaro tinan 2020, postu administrativu Lolotoe iha aldeia 20, suku hitu, ho totál populasaun na’in 8,706 komposta hosi mane 4,810 no feto 3,936, ho totál xefe família 2.006.
Notísia relevante: Governu presiza halo intervensaun urjénsia ba estrada Galisapulu iha Bobonaro
Jornalista: Sérgio da Cruz
Editór: Evaristo Soares Martins
