DILI, 30 novembru 2022 (TATOLI)–Institutu Siénsia Saúde (ICS, sigla portugés) determina ona kalendáriu serimónia graduasaun ba estudante finalista 290 resin, ne’ebé sei realiza iha dezembru tinan ne’e.
“Ami deside ona dezembru ikus sei hala’o serimónia graduasaun ba estudante finalista hamutuk 290 resin. Ami sei submete dadus estudante ba Ministériu Ensinu Superiór Siénsia no Kultura (MESSK) atu halo prosesu verifikasaun, parese semana oin,” Reitór ICS, Domingos Soares, hateten ba Agência Tatoli, iha ninia knaar fatin, kampus ICS, Comoro, kuarta ne’e.
Prosedimentu ba prosesu verifikasaun no publikasaun lista graduadu iha Jornál Repúblika tenke fulan-ida, nune’e Reitór ICS garante buat hotu sei la’o di’ak, tanba ne’e dadus hosi eskola tenke loloos atu nune’e fasil ba ministériu atubele halo verifikasaun no simplismente halo aprovasaun.
Notísia relevante: ICS prepara rekursu atu hadi’a kualidade saúde iha TL
Planu graduasaun ne’e hosi tinan letivu 2018 no 2019, maibé sei gradua uluk estudante hosi tinan letivu 2018, hafoin mak tinan 2023 sei kontinua gradua tan estudante finalista hosi tinan letivu 2019.
“Ami iha dadus loloos ba estudante tinan letivu rua hamutuk 590 resin, maibé ami sei gradua uluk estudante tinan 2018 iha dezembru ikus tinan ida-ne’e, hafoin sei kontinua fali graduasaun estudante tinan letivu 2019 hamutuk 300 resin iha tinan 2023,” nia tenik.
Estudante tinan letivu 2023 sei halo hela preparasaun balun hanesan ezame monografia, nune’e bainhira sira ramata ona maka instituisaun sei submete dadus ba MESSK hodi halo verifikasaun.
Estudante 290 resin ne’ebé atu simu graduasaun mai hosi fakuldade siénsia saúde no kursu lima hanesan kursu enfermajen, farmásia, parteira, siénsia médika no laboratóriu inklui nutrisaun.
Totál estudante ICS ein jerál hamutuk 3.090 resin no tuir planu tinan ne’e sei simu tan estudante 300, maibé bainhira iha prosesu inskrisaun maka rejista ema barak liu, maka parte institutu sei esforsu kria tan kondisaun atubele akumula.
Jornalista : Tomé Amado
Editora : Julia Chatarina
