MESSK avalia ona kampus ramu UNPAZ iha Covalima
DILI, 30 novembru 2022 (TATOLI)–Ekipa avaliadór hosi Ministériu Ensinu Superiór Siénsia no Kultura (MESSK) halo ona avaliasaun ba kampus ramu Universidade da Paz (UNPAZ) iha Covalima no sei kontinua hakat ba Rejiaun Administrativa Espesiál Oé-cusse Ambeno (RAEOA).
Reitór UNPAZ, Adolmando Soares Amaral, hateten, avaliasaun ne’e realiza tanba durante ne’e seidauk hetan lisensa operasionál, nune’e ministériu delega ninia ekipa atu avalia kondisaun no situasaun ne’ebé akontese iha terrenu.
“Ita simu ona ekipa avaliadór hosi ministériu iha semana hirak liubá. Sira halo ona avaliasaun maibé rezultadu seidauk fó sai tanba tenke hein hotu avaliasaun iha kampus ramu seluk iha RAEOA maka sei fó sai ninia rezultadu dala-ida de’it,” Reitór relata ba Agência Tatoli, iha ninia knaar fatin, kampus UNPAZ, Osindo 1 Manleuana, kuarta ne’e.
Notísia relevante: MESSK avalia padraun 11 ezisténsia ramu UNPAZ iha Covalima
Nia esplika, avaliasaun ne’ebé MESSK halo atu haree fasilidade kampus ramu UNPAZ hanesan ba ekipamentu no saida de’it maka utiliza, ne’ebé konfirma buat hotu tenke prienxe padraun 10 inklui indikadór 100 resin.
“Universidade ida bainhira atu hetan lisensa operasionál tenke prienxe uluk rekezitu sira ne’ebé maka konsagra ona atu nune’e bele garante kualidade hodi fó imajen di’ak ba ema hotu,” nia tenik.
Aleinde ne’e, ekipa avaliadór sira sei desloka ba Oé-cusse iha loron 08 dezembru hodi halo avaliasaun ba kampus ramu iha RAEOA iha fulan-dezembru nia laran.
“Rezultadu avaliasaun ne’e rasik sei públika filafali ba públiku atubele hatene kondisaun no situasaun iha kampus ramu rua,” Reitór dehan.
Tuir Adolmando Amaral, prosesu avaliasaun ne’ebé hahú daudaun ne’e fó vantajen boot ba UNPAZ bainhira kampus ramu rua hetan lisensa operasionál ba futuru tanba sei la difikulta haluan ramu sira iha fatin seluk.
Jornalista : Tomé Amado
Editora : Julia Chatarina
