DILI, 01 dezembru 2022 (TATOLI)–Ministru Petróleu no Minerál (MPM), Víctor da Conceição Soares, kinta ne’e, simu vizita hosi Reprezentante Espesiál Austrália ba Greater Sunrise, Steve Bracks , hodi ko’alia kona-ba dezenvolvimentu kampu petrolíferu.
“Sente orgullu no kontente tanba hili ona ha’u nu’udar reprezentante espesiál Austrália ba Greater Sunrise. Iha diskusaun pozitivu barak, ne’ebé hosi Austrália nia parte hakarak projetu Greater Sunrise sei dezenvolve tuir dalan komersialmente viável. Projetu ne’e importante tebes ba Austrália tanba iha diskusaun pozitivu barak ho entidade Timor-Leste,” Steve Bracks, informa hafoin sorumutuk ho Ministru Petróleu no Minerál, iha salaun enkontru MPM, Bebora.
Tuir Reprezentante espesiál ne’e, konsórsiu iha projetu Greater Sunrise mak sei deside dezenvolvimentu petrolíferu sei hala’o iha Timor-Leste ka Austrália.
Notísia relevante: TL-Austrália sei ko’alia kompeténsia jurisdisaun dezenvolvimentu esplorasaun Greater Sunrise
Iha biban hanesan, Ministru Víctor da Conceição, hateten, objetivu sorumutuk entre parte rua hodi ko’alia kona-ba perspetiva no aspirasaun relativamente ho projetu Greater Sunrise, atu haree ba planu no estratejia Timor-Leste ne’ebé liga ho projetu tasi-mane.
“Iha sorumutuk ne’e ami ko’alia buat barak hodi reafirma Timor-Leste nia kompromisu para Greater Sunrise no kadoras atu mai Timor-Leste hodi dezenvolve ita-nia rekursu iha rai-laran. Liuhosi diskusaun sira ne’e Reprezentante espesiál ne’e bele fó ninia apoiu ein termu polítika tanba durante ne’e nia serbisu iha Timor-Leste,” Ministru akresenta.
Nune’e, governante ne’e espera katak, ho knaar ne’e, Steve Backs bele aselera negosiasaun projetu Greater Sunrise ne’ebé durante ne’e Timor-Leste proukupa katak seidauk bele dezenvolve.
Aleinde ne’e, Reprezentante Espesiál Austrália hasoru malu mós ho entidade sira hosi Autoridade Nasionál Petróleu no Minerál (ANPM), Timor Gás no Petróleu, Empreza Públika (Timor GAP, E.P), Prezidente Repúblika, Primeiru-Ministru, inklui entidade sira seluk.
Estadu Timor-Leste liuhosi Timor GAP, E.P hola parte iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.
Jornalista : Antónia Gusmão
Editora : Julia Chatarina
