iklan

BOBONARO, ELEISAUN, HEADLINE, MUNISÍPIU, POLÍTIKA

CNE-STAE hala’o edukasaun sívika ba eleitór sira iha Tapo

CNE-STAE hala’o edukasaun sívika ba eleitór sira iha Tapo

Eleitór sira partisipa edukasaun sívika kona-bá lala'ok eleisaun nian iha suku Tapo, postu administrativu Bobonaro, munisípiu Bobonaro. Imajen Tatoli/Sérgio da Cruz.

BONONARO, 01 dezembru 2022 (TATOLI)-Komisaun Nasionál Eleisaun (CNE sigla portugés) serbisu hamutuk ho Sekretariadu Tékniku Administrasaun Eleitorál (STAE), kinta ne’e realiza edukasaun sívika ho tema “Hau sente lakon no moe wainhira la ba vota” ba eleitór sira iha suku Tapo, postu administrativu Bobonaro, munisípiu Bobonaro.

Vise Prezidente CNE, Domingos Barreto, esplika atividade ne’e hanesan programa rútina CNE nia ne’ebé implementa iha munisípiu hotu-hotu, hodi eleva eleitór sira-nia koñesimentu ba lala’ok eleisaun nian nune’e bele ezerse sira-nia direitu ho loloos.

Matéria ne’ebé aprezenta iha atividade ne’e maka hanesan lalaok órgaun eleitorál, resensiamentu eleitorál no sistema eleisaun parlamentár 2023.

Notísia relevante: CNE hala’o edukasaun sívika ba estudante sira iha Bobonaro

“Atu nune’e sira bele hatene no uza sira-nia direitu atu ba vota hodi partisipa iha festa demokrasia ne’ebé sei realiza eleisaun parlamentár,” nia informa ba Tatoli, iha sede suku Tapo.

Edukasaun sívika ne’e sei kontinua implementa mós iha fatin sira hotu hanesan parte kondisaun ne’ebé CNE prepara.

Tanba hafoin tinan foun Prezidente Repúblika, José Manuél Ramos Horta, sei dekreta kalendáriu eleisaun parlamentár 2023 nian.

Vise Prezidente CNE ne’e husu ba eleitór sira iha munisípiu Bobonaro atu partisipa másimu iha atividade edukasaun sívika ne’e no bainhira fila ba uma bele hatutan fali ba eleitór sira ne’ebé seidauk hetan informasaun kona-bá lalaok eleisaun.

“Sidadaun sira atu iha nasionalizmu ne’ebé forte hodi nune’e bele kontribui iha festa demokrasia no kontrubui ba prosesu konstrusaun estadu, tanba votu ne’e la obrigatóriu, maibe ema-nia partisipasaun ne’e importante tebes, votu ne’e ninia valór boot iha prosesu konstrusaun estadu,” nia dehan.

Xefe suku Tapo, Xavier Barreto Cardoso, lori komunidade nia naran agradese ba órgaun eleitorál ne’ebé mak kontinua implementa programa ne’e.

“Ha’u hanoin programa ida-ne’e di’ak, atu nune’e ba to’o faze eleisaun komunidade sira, labele iha falla hanesan buat sira-ne’ebé ke uluk liu ona, entaun liuhosi edukasaun sívika ida-ne’e labele akontese tán, tanba ema hotu-hotu iha direitu ba vota, nune’e ho koñesimentu informasaun sira-ne’e bele hasa’e taxa partisipasaun eleitór sira-nia iha momentu eleisaun,” nia katak.

Eleitór ne’ebé partisipa iha atividade ne’e reprezentante administradór postu administrativu Bobonaro no reprezentante komandante polísia eskuadra Bobonaro no eleitór kuaze na’in-150.

Notísia relevante: STAE Bobonaro rejista eleitór foun na’in-6.289 

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!