iklan

HEADLINE, MUNISÍPIU, VIQUEQUE

KHC konserva bee ba abitante suku rua iha Viqueque

KHC konserva bee ba abitante suku rua iha Viqueque

Ekipa KHC entrega konservasaun bee ba komunidade iha suku Uma-Uain Kraik, Viqueque, kinta (01/12). Imajen Tatoli/Vitorino Lopes da Costa

VIQUEQUE, 01 dezembru 2022 (TATOLI)–Organizasaun Naun Governamentál (ONG) Fundasaun K’nua Haberan Komunidade (KHC, sigla portuges) hamutuk ho Catholic Relief Services (CRS) konserva bee posu ida ba abitante suku Uma-Kiik no suku Uma-Uain Kraik, iha postu administrativu Viqueque Vila, munisípiu Viqueque.

Reprezentante Diretór Fundasaun KHC, Euquilito Amaral, hateten, luta atu liberta povu hosi kiak no mukit seidauk atinje no laiha rohan, nune’e ekipa Hakoren kompostu hosi Fundasaun KHC no CRS koko liberta hosi aspetu rai no bee, tamba kestaun rua ne’e sai sentru ba nesesidade moris nian.

“Kuaze tinan hirak liubá kotuk, komunidade hosi suku Uma Kiik no Uma Kraik, iha aldeia rua mak durante ne’e susar asesu bee-moos, hodi halo komunidade tenke la’o ho distánsia dook hodi kuru bee-moos. Ida-ne’e fó impaktu negativu ba populasaun sira. Ho difikuldade sira mak reprezentante komunidade hato’o preukupasaun ba parte kompetente iha Diresaun Servisu Munisipál Água Saneamentu no Ambiente (SMASA), maibé kestaun alokasaun orsamentu limitadu. Ho nune’e, husu ajuda ba Fundasaun KHC no CRS, nune’e nia rezultadu mak ohin loron mai hamutuk enserra atividade ida-ne’e,” Euquilito Amaral hateten ba Agência Tatoli, iha postu Viqueque Vila, kinta ne’e.

Nune’e, entidade rua prontu apoiu Governu liuhosi Autoridade munisipál hodi hadi’a rekursu rai no bee ba komunidade, tanba durante ne’e sira mós halo konservasaun rai no bee, liu-liu ba kanalizasaun bee-moos ba komunidade.

“Rekursu bee ne’e importante tanba fó vantajen ba produsaun agrikultura sira. Hosi rezultadu konservasaun ne’e bele kontribui ba dezenvolvimentu komunidade,” nia akresenta.

Notísia relevante: KHC entrega konservasaun bee-matan ba abitante aldeia Bahafou Viqueque

Aleinde ne’e, konservasaun rai no bee hodi kontrola erozaun, tanba ne’e presiza implementa iha munisípiu sira hodi hamoris filafali bee-matan sira ne’ebé mak kuaze maran iha tempu bai-loron.

Hosi envolvimentu ONG lokál no internasionál nia apoiu bele atinje objetivu dezenvolvimentu sustentável iha rai-laran.

“Governu presiza identifika hodi investe iha setór prioritáriu ne’ebé produtivu hanesan fornesimentu bee-moos ba Komunidade hodi halo serbisu ne’ebé foku liu ba konservasaun rekuru naturál atu asegura rekursu bee iha futuru oin mai,” nia tenik.

Iha fatin hanesan, Sekretáriu munisípiu Viqueque, José da Costa de Sousa, konsidera enserramentu atividade konservasaun ba estrutura rai no bee ba komunidade aldeia Fatuhadan, suku Uma Uain Kraik no Macdean área Leodato, suku Uma Kiik, ajuda tebes kondisaun komunidade.

“Programa Hakoren hosi entidade rua ho objetivu atu entrega obra konservasaun ba autoridade no komunidade hodi kontinua konserva no uza ba nesesidade maibé presiza nafatin halo kontrolu,” nia hato’o.

Nune’e mós, Diretór Bee Timor-Leste, Empreza Públika (BTL, E.P), Marito da Costa, hateten, bee posu ne’ebé kee iha suku Uma Kiik, bainhira halo teste ba amostra bee, hetan rezultadu di’ak.

“Bee posu ne’ebá foin lalais ami halo ona teste iha laboratóriu ninia rezultadu di’ak. Nune’e komunidade bele uza ba konsumu loron-loron,” nia dehan.

Programa Hakoren bele haforsa no hasa’e komunidade nia reziliénsia ba alterasaun klimátika no fó benefísiu ba abitante 87 hosi uma-kain 17 hosi suku rua.

Fundasaun KHC entrega ona atividade konserva bee no halo debun bee matan ba komunidade hodi sira rasik bele sai na’in, nune’e komunidade kria grupu no rai osan fundu sosiál, ne’ebé semana 1 kada uma-kain 1 kontribui $0,25 atu halo manutensaun sasán ne’ebé uza no sosa pulsa eletrisidade.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!