EKONOMIA, HEADLINE

CLN koopera ho JICA motiva komunidade filafali bá to’os-natar

CLN koopera ho JICA motiva komunidade filafali bá to’os-natar

Natar iha Atabae. Imajen Tatoli/António Gonçalves

DILI, 02 dezembru 2022 (TATOLI)—Prezidente Sentru Lojístiku Nasionál (CLN, sigla portugés), Jervázio Cardoso de Jesus da Silva, hateten, sira-nia parte hasoru malu ona ho Japan International Cooperation Agency (JICA) atu serbisu hamutuk hodi motiva liután komunidade filafali ba to’os no natar hodi prodús produtu lokál.

“CLN foin lalais hasoru malu ona JICA hodi halo parseira no kria mekanizmu atu motiva komunidade ne’ebé husik sira-nia natar no to’os no bele filafali tanba osan sira ne’e iha to’os no natar, tanba polítika Governu liuhosi Cesta Bázika atu sosa produtu lokál ne’e fó benefísiu ba povu,” Prezidente CLN, informa ba Agência Tatoli, foin lalais ne’e, liuhosi entrevista eskluziva iha estúdiu Farol.

CLN nia pozisaun mak atu motiva grupu agrukultór sira ida-idak atu fila ba to’os no natar.

“Ita-nia serbisu mak motiva, tanba intervensaun no sosa sira ne’e atu motiva sira. Kada orsamentu ne’ebé aloka ba CLN hodi halo atividade ida mak motiva agrikultór sira filafali ba to’os no natar,” nia akresenta.

Notísia relevante: Governu aloka millaun $3 ba CLN iha tinan 2023

Durante halo intervensaun motiva agrikultór sira, iha grupu agrikultór 40 resin mak hakarak sira-nia produsaun ne’ebé halo kolleta tenke sosa direitamente.

“Ami nafatin esforsu an halo sosializasaun di’ak liután iha terrenu, tanba ita hatene katak kualker atividade ne’ebé lori osan Estadu tuir lei hateten tenke filafali ba Estadu,” nia tenik.

Jervázio Cardoso, haktuir, dalabarak komunidade seidauk hatene didi’ak lei ne’ebé iha, hanesan iha tinan kotuk agrikultór sira reklama ba CLN tanba la selu agrikultór sira-nia produtu.

“Uluk JICA serbisu hamutuk ho CLN halo pagamentu direita, maibé ami hetan fali asisténsia hosi finansa sentrál dehan lei la fó dalan halo pagamentu direita,” nia salienta.

Tuir Prezidente CLN, kestaun ne’e sai dezafiu ida tanba dalaruma ema la entende mekanizmu Governu, tanba ne’e CLN tenta buka dalan koordena ho Servisu Verifikasaun Emprezariál, Institutu Públiku (SERVE, I.P) hodi kria dokumentu ho vendór ba agrikultór sira atu fasilita pagamentu.

“Ho dokumentu vendór nian ne’e mak iha tinan kotuk ita rezolve ona haree kulit, ne’ebé antes ne’e halo kontratu ona ho agrukutór sira,” nia esplika.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!