iklan

EKONOMIA, HEADLINE

Governu aloka millaun $3 ba CLN iha tinan 2023

Governu aloka millaun $3 ba CLN iha tinan 2023

Funsionáriu CLN hatama foos ba armazen nasionál iha Bebora, sábadu (11/06). Imajen/CLN

DILI, 02 dezembru 2022 (TATOLI)—Governu aloka orsamentu millaun $3 ba Sentru Lojístika Nasionál (CLN, sigla portugés) hodi implementa programa iha tinan 2023.

“Orsamentu ne’e iklui kustu operasionál, foku kontinua sosa produtu lokál, sosa nafatin foos importasaun hamutuk tonelada 4.800 no motiva agrikultór sira filafali ba to’os no natar,” Prezidente CLN, Jervazio Cardoso de Jesus da Silva, hateten ba Agência Tatoli, foin lalais ne’e iha programa entrevista eskluziva, iha estúdiu Farol.

Nia dehan, intensaun CLN kontinua sosa foos importasaun tanba produtu rai-laran la sufisiente atu hatan ba nesesidade rai-laran.

“Kada tinan ita sempre sosa foos importasaun no nafatin apoiu produtu ne’ebé ita sosa hosi agrikultór sira. Tinan ne’e, ita sosa produtu lokál hodi tau armezen nasionál hamutuk tonelada ualu no importasaun tonelada 4.750,” nia akresenta.

Notísia relevante: CLN planeia sosa tan foos importasaun tonelada 10.000 tinan oin

Aleinde ne’e, CLN sosa foos-rai tonelada ualu inklui produtu seluk hanesan koto, fore-rai, fore-mungu iha tinan kotuk uza orsamentu COVID-19 ho montante millaun $2 no iha marsu tinan ne’e halo hotu ona distribuisaun ba maluk kbiit laek 102.000.

“Ita sosa tan produtu lokál tinan ne’e hodi tau iha armazen hamutuk tonelada 1.500, ne’ebé kada produtu CLN sosa bazeia ba diploma ministeriál foos-rai $1,25/kilograma, koto $2,50/kilograma, fore-mungu $2/kilograma, fore-rai $2/kilograma no fore-metan $1,50/kilograma, batar $0,50/kilograma.

Produtu lokál sira, liu-liu foos rai tama iha armazen ne’e barak liu maihosi munisípiu Viqueque, Bobobaro, Baucau, Covalima, Manatuto, no Ermera.

Prosesu sosa iha mekanizmu rua, CLN rasik mak tun ba sosa maibé tanba iha difildade hanesan menus rekursu umanu, seluk mak kontratu ho grupu agrikultór sira mak lori mai.

“Produtu ne’ebé ita sosa tau armazen atu asegura de’it ba situasaun emerjénsia ruma, nune’e Governu liuhosi CLN bele asegura,” nia tenik.

Difikuldade ne’ebé CLN hasoru iha tinan 2022 mak menus rekursu umanu, tanba funsionáriu barak mak hanesan destakadu de’it, ne’ebé hosi funsionáriu 206, permanente 21 no kontratudu 100 resin.

“Entaun ida-ne’e hanesan dezafiu ba CLN, ita espera iha tinan oin bele rezolve nune’e bele hafasil ita-nia servisu,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!