iklan

EKONOMIA, BOBONARO, HEADLINE, MUNISÍPIU

EDTL finaliza ona projetu liña eletrifikasaun komunitária tolu iha Bobonaro

EDTL finaliza ona projetu liña eletrifikasaun komunitária tolu iha Bobonaro

Supervizór EDTL Munisípiu Bobonaro, Mário de Jesus. Imajen Tatoli/Sérgio da Cruz.

BOBONARO, 02 dezembru 2022 (TATOLI)-Koordenadór Eletrisidade Timor-Leste, Empreza Públika (EDTL,E.P), Munisípiu Bobonaro, Mário de Jesus, fó-sai katak tékniku sira no komunidade konklui ona projetu liña eletrifikasaun ho karáter komunitária tolu iha munisípiu Bobonaro.

Notísia relevante: EDTL Bobonaro esforsu fornsese eletrisidade ba komunidade Balibo-Atabae

“Serbisu ne’e ami (EDTL) hamutuk ho komunidade mak halo, ida implementa iha aldeia Pisu-Laran, suku Meligo no aldeia Asalaun, suku Manapa, postu administrativu Cailaco. Ida iha aldeia Nunura, suku Leolima, postu administrativu Balibo mak remata ona 100% no ahi lakan tiha ona,” nia informa ba ba Tatoli, iha Maliana, sesta ne’e.

Daudaun ne’e rojetu komunitária implementa hela iha aldeia Lugululi, postu administrativu Cailaco atinje ona 80%, no aldeia Srilaku, suku Leo-lima, postu administrativu Balibo.

“Ida koléjiu Lugululi ne’e ami garante antes tama Natál ahin lakan ona, agora ida Srilaku nian ne’e maka ohin ami foin karrega sasán poste sira hodi dezloka ona ba. Ida-ne’e tinan oin ami garante bele lakan ona,” nia katak.

Nia dehan, projetu  ne’e ninia natureza serbisu iha oin rua, komposta hosi tékniku no la’ós-tekniku.

“Tékniku ne’e eme ne’ebé ami rekruta funsionáriu kazuál, ami kontratu bazea ba durasaun obra, sira mak halo instalasaun, ida la’ós-tekniku sira-ne’e mak komunidade mak halo, ke’e rai-ku’ak, rasta fiu, tesi-ai, hotu tiha mak EDTL selu,” nia akresenta.

Responsável EDTL Munisípiu Bobonaro ne’e hatutan, durante implementasaun projetu komunitária ne’e, maioria autoridade lokál, komunidede sira kontribui no koopera tebes ho ekipa tékniku sira.

Enkuantu projetu eletrifikasaun ne’ebé EDTL kontrata empreza sira implementa iha munisípiu Bobonaro ba tinan ne’e iha fatin tolu konklui ona mak hanesan suku Atabae iha pakote rua, no ida seluk iha suku Rairobo, postu administrativu Atabae.

Daudaun ne’e sei iha faze implementasaun mak ida kontinuasaun hosi suku Atabae ba fali ponte Loes mak sei iha prosesu.

Ida seluk hosi suku Cowa daudaun ne’e ninia progresu fíziku atinje ona 70%, projetu ida hosi diresaun Ensinu Sekundária Jerál (ESG)  Dom Martinho da Costa Lopes, Maliana ba suku Tapo-Memu, no hosi suku Tapo-Memu kontinua ba suku Saburai, postu administrativu Maliana.

Nune’e nós projetu ida hosi aldeia Bilicou, suku Holsa ba aldeia Pipglak, suku Tapo-Memo, depois ida hosi suku Saburai kontinua ba aldeia Atus, suku Gildapiál, no ida hosi aldeia Joilpho, suku Guda, postu administrativu Lolotoe.

Notísia relevante: EDTL promete populasaun tomak asesu enérjia elétrika iha 2023

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!