iklan

NASIONÁL, HEADLINE, KAPITÁL

MOP enserra R4D-SP no inaugura edifísiu DNEPCC

MOP enserra R4D-SP no inaugura edifísiu DNEPCC

Ministru Obra Públika, Abel Pires da Silva. Imajen Tatoli/Francisco Sony

DILI, 02 dezembru 2022 (TATOLI)—Ministériu Obra Públika (MOP), sesta ne’e, enserra Programa Apoiu Estrada Rurál ba Dezenvolvimentu (R4D-SP, sigla inglés) no inaugura edifísiu Diresaun Nasionál Estrada Ponte no Kontrolu Seia (DNPCC, sigla portugés), ne’ebé hetan apoiu finansiamentu hosi Austrália ba rekuperasaun kalamidade 04 abril 2021.

Biban ne’e, Ministru Obra Públika, Abel Pires, agradese ba Governu Austrália ne’ebé hamutuk ho International Labour Oraganization (ILO) bele apoiu Timor-Leste liuhosi DNPCC halo reabilitasaun ba estrada iha territóriu laran.

“Ohin ita halo enserramentu ba R4D-SP ne’ebé hala’o ona durante tinan-10. Ita-nia parseiru sira ajuda ita halo reabilitasaun ba estrada sira iha área rurál no ohin inaugura mós edifísiu ida ba ekipa rekuperasaun kalamidade iha Diresaun Nasionál Estrada Ponte no Kontrolu Seia, ne’ebé hetan apoiu hosi Governu Austrália,” Ministru hateten iha salaun DNPCC, iha Raikotu.

Notísia relevante: MOP no Embaixadór Austrália asina akordu extende programa R4D-SP

Programa estrada rurál fó benefísiu boot ba povu Timor-Leste durante tinan-10 (2012 to’o 2022), liuliu iha área rurál sira.

Nia dehan, maski R4D-SP ne’ebé responsável hosi ILO ohin ramata ona, maibé ba oin Governu Austrália no Timor-Leste kontinua nafatin serbisu hamutuk liuhosi programa foun atu kontinua halo reabilitasaun estrada iha área rurál.

“Durante sira serbisu hamutuk ho ita, estrada ne’ebé sira halo reabilitasaun besik kilómetru 1.000 iha territóriu laran,” nia akresenta.

Iha fatin hanesan, Charge d’Affairs Hosi Embaixada Austrália, Bryce Hutchesson, hateten, Governu Austrália kontente tebes bele suporta povu Timor-Leste liuhosi programa ne’e.

“Ba projetu ne’e rasik, Governu Austrália fornese ona osan millaun AU$64, hahú hosi tinan 2012 ami halo parseria ho Governu Timor-Leste no ILO. Ita kontente tanba populasaun 70% mak hela iha área rurál. Bainhira ita apoiu komunidade, bele fasilita hasa’e dezenvolvimentu rurál no hosi serbisu ne’e rezultadu balun ita atinje ona mak reabilitasaun estrada kuaze kilómetru 87, ne’ebé reprezenta 50% hosi rede estrada rurál iha territóriu laran no halo treinamentu ba kontratór ka kompañia lokál hamutuk 370 ba implementasaun projetu estrada ho di’ak, seguru no kualidade,” nia tenik.

Aleinde ne’e, fornese apoiu treinamentu tékniku ba funsionáriu MOP hosi nível nasionál to’o munisipál hodi bele haforte liután planeamentu no jestaun ba implementasaun projetu estrada rurál.

“Ami mós fó apoiu finansiamentu $30.000 ba konstrusaun edifísiu ba ekipa kalamidade iha DNPCC inklui sasán tékniku sira,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!