AILEU, 27 setembru 2021 (TATOLI)-–Governu Timor-Leste liuhosi Ministériu Obra Públika (MOP), Salvador Eugênio Soares dos Reis, no Embaixadór Austrália iha Timor-Leste, Peter Roberts, asina akordu extensaun Roads for Development Support Programme (R4D-SP) to’o tinan 2022.
“Ha’u ho Embaixadór Austrália lansa ofisiál ka asina akordu ba programa R4D-SP Bridging Phase, ne’ebé hahú iha tinan 2012 to’o 2021, maibé ita hakarak extende tan to’o 2022,” Ministru Salvador, hateten, iha salaun veteranu, Aileu, segunda ne’e.
Notísia relevante: Tinan 2022, MOP foku projetu reabilitasaun no manutesaun estrada rurál
Governu Austrália apoia ona orsamentu millaun AU$65 liuhosi International Labour Organization (ILO), atu fó asisténsia téknika iha área formasaun, planeamentu dezeñu no jestaun projetu ba Governu liuhosi MOP.
Durante ne’e, ILO fó ona asisténsia téknika ba MOP liuhosi Diresaun Nasionál Obra Públika, Diresaun Nasionál Estrada, Ponte, Kontrolu no Cheia (DNEPCC, sigla portugés), atu hala’o atividade planeamentu, kapasita empreza kompete konkursu públiku, kapasita jestór kompañia sira atu garante kualidade investimentu estrada rurál.
“Ita-nia Governu tuir akordu ne’e tenke tau mós millaun $20 ba investimentu kapitál hosi asisténsia téknika, ne’ebé Governu Austrália halo liuhosi ILO hodi halo reabilitasaun períodika no rutina ba estrada rurál liuhosi Orsamentu Jerál Estadu (OJE),” Governante ne’e dehan.
Iha biban hanesan, Embaixadór Austrália, Peter Roberts, hateten, Austrália iha kompromisu kontinua suporta Timor-Leste liuhosi ILO atu fó asisténsia ba programa estrada rurál ba dezenvolvimentu.
“Austrália kontente tebes bele serbisu hamutuk no hahú suporta programa ne’e hahú tinan 2012, ne’ebé sei kontinua nafatin tanba rekoñese katak importante mantein infraestutura iha rejionál no rurál inklui promove setór privadu,” nia hatutan.
Governu Austrália nia apoiu ba planemantu, liuliu kriasaun planu mestre estrada rurál no fó formasaun ba tékniku sira iha DNEPCC hamutuk 500 resin inklui fó formasaun ba jestór kompañia sira kuaze 650 resin.
Liuhosi Programa ne’e konsege harii ona laboratóriu iha munisípiu Baucau, Liquiçá, Covalima, Bobonaro no Rejiaun Administrativa Espesiál Oé-Cusse no Ambeno (RAEOA) atu halo teste ba materiál prosesu konstrusaun hodi garante kualidade ba investimentu ne’e.
Jornalista : Florêncio Miranda Ximenes
Editora : Julia Chatarina
