iklan

DILI, POLÍTIKA

PN prontu aprova loron nasionál ba Ema ho Defisiénsia

PN prontu aprova loron nasionál ba Ema ho Defisiénsia

Prezidente Parlamentu Nasionál, Aniceto Longuinhos Guterres Lopes. Imajen Tatoli/Antonio Daciparu.

DILI, 02 dezembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten Parlamentu Nasionál prontu aprova loron nasionál ba Ema ho Defisiénsia (EhD) tuir pedidu hosi Asosiasaun Defisiensia Timor-Leste (ADTL).

Notísia Relevante: OXFAM husu Governu investe orsamentu ba Ema ho Defisiénsia

“Se iha proposta ruma mai hosi Governu ami prosesa ba loron nasionál ema ho defisi’ensia sira-ne’e apenas ho rezolusaun ruma,” Prezidente PN, Aniceto Longuinhos Guterres Lopes, hateten ba Agênsia Tatoli, sesta ne’e.

Tan ne’e, PN hein bainhira proposta ruma hosi parte Governu mak prosesa de’it hodi aprova rezolusaun hodi institui loron nasionál ba ema ho defisiénsia sira no mezmu nune’e ADTL rasik husu PN atu aprova loron nasionál ba ema ho defisiénsia sira.

Iha loron 03 dezembru, Asembleia Jerál Organizasaun Nasaun Unida (ONU) proklama ona hanesan loron mundiál ba ema ho defisénsia iha  mundu., no iha Timor-Leste kada tinan ita selebra loron ne’e hodi selebra, festeza, valoriza, refleta, apreende inklui promove no proteje direitu ema ho defisiénsia sira.

Ba tinan ne’e, ADTL realiza atividade lubun hodi komemora loron internasionál ne’e hanesan semináriu nasionál ba promosaun no protesaun direitu ema ho defisiénsia, sensibilizasaun no atendimentu direta ba ema ho defisiénsia, marsa ba inkluzaun defisiénsia, pintura ba inkluzaun defisiénsia, konversa hodi hametin relasaun amizade ba parseiria inkluzaun defisiénsia no palku livre (hananu hamutuk, tebe-tebe no seluk tan).

Prezidente PN ne’e hateten, kada tinan iha 03 dezembru komemora loron internasionál ema ho defisiénsia hodi fó importánsia inkluzaun iha prosesu dezenvolvimentu.

“Komemorasaun ne’e atu fó sentidu importánsia atensaun inkluzaun ema ho defisiénsia sira iha prosesu dezenvolvimentu nasaun no rai hotu-hotu hanesan iha Timor-Leste, Governu rasik liuhosi ministéiru relevante sei komemora,” nia dehan.

Estadu iha kompromisu boot, tanba ne’e Governu prepara hela planu asaun atu halo inkluzaun ba sidadaun sira-ne’ebé ho defisiénsia iha prosesu dezenvolvimentu nasionál, hanesan trasa Polítika Nasionál Defisiénsia, Planu Asaun Nasionál Defisénsia 2021-2030 no ikus ne’e mak foti asaun ba adesaun Timor-Leste nian ba Konvensaun ONU ba direitu ema ho defisiénsia.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!