iklan

EDUKASAUN, HEADLINE

Reitór UNITAL husu finalista 37 tenke hatudu kapasidade lideransa iha sosiedade

Reitór UNITAL husu finalista 37 tenke hatudu kapasidade lideransa iha sosiedade

Logotipu UNITAL. Imajen/Espesiál

DILI, 02 dezembru 2022 (TATOLI)–Mensajen Reitór Universidade Orientál Timor-Lorosa’e (UNITAL), Florindo Pereira, ne’ebé hato’o hosi Pro-Reitór IV, Edang Srinensi, husu atu estudante finalista na’in-37 ne’ebé simu ona judisium, atu kontinua sai estudante ne’ebé iha kualidade no tenke hatudu kapasidade lideransa iha sosiedade nia le’et.

Reitór UNTAL, Florindo Pereira, hateten, maski finalista sira termina ona estudu maibé universidade kontinua loke nafatin odomatan atu serbisu hamutuk, atu nune’e bele kontinua dezenvolve nafatin universidade ne’e ba futuru ida di’ak liu.

“Ita sei kontinua serbisu hamutuk liuhosi siénsia peskiza no serbisu sosiál hodi serví komunidade, katak ita-nia prosesu ensinu aprendizajen kontinua nafatin no sei la para,” Mensajen Reitór iha serimónia judisium ba da-XI, ne’ebé realiza iha salaun UNITAL, Becora, sesta ne’e.

Notísia relevante: MESSK seidauk finaliza verifikasaun lista graduadu 393 hosi UNITAL

Reitór hakarak judista sira bainhira filafali ba hamutuk ho komunidade, tenke buka haka’as-an atu sai estudante ne’ebé iha responsabilidade no hatudu kapasidade iha komunidade nia le’et nu’udar antigu alunu, tanba UNITAL kada tinan sempre prodús rekursu umanu sira ne’ebé ho kualidade hodi prepara-an atu serví Estadu, nasaun no komunidade iha país ne’e.

“Tanba ne’e tenke kuidadu almamater ho didi’ak atu labele hamonu naran UNITAL iha públiku. Ha’u hakarak fó korajen ba ita-boot sira katak durante tinan-haat resin imi uza almamater ida-ne’e hodi hatudu identidade nu’udar estudante UNITAL, maibé ohin ita-boot sira sai ona hanesan alumni ida maibé universidade sei konta nafatin ho imi iha ninia dezenvolvimentu sira. Tanba ne’e buka haka’as-an ba atu sai estudante ne’ebé iha responsabilidade ba família no sosiedade nia laran,” nia fó hanoin.

Estudante finalista 37 ne’ebé termina ona estudu iha nível lisensiatura ne’e, kompostu hosi departamentu tolu hanesan relasaun internasionál iha estudante tolu, komunikasaun sosiál iha estudante 14 no administrasaun públika estudante 20.

Enkuantu, desizaun Konsellu Reitoria nian deside ona katak graduasaun ba tinan 2022 ne’e sei realiza iha dezembru, maibé data atu hala’o serimónia seidauk deside tanba sei hein hela desizaun hosi Ministériu Ensinu Superior Siénsia no Kultura (MESSK).

“Ami submete ona lista estudante graduadu 393 ba Ministériu Ensinu Superior Siénsia no Kultura hodi halo prosesu verifikasaun. Ami hein de’it ramata ona depois ministériu kuandu hatún ona despaisu no públika ona lista graduadu sira nia iha Jornál epúblika maka ami foin deside kalendáriu fiksu ba graduasaun nian,” Florindo Pereira dehan.

Estudante finalista sira ne’ebé preparadu simu graduasaun, kompostu hosi fakuldade hitu hanesan fispol, saúde, edukasaun, diretu, enjeñaria, agrikultura, no ekonomia inklui kursu 35.

“Entre fakuldade hitu ne’ebé eziste, iha fakuldade lima maka finaliza ona sira-nia prosesu judisium, enkuantu fakuldade fispol no diretu foin atu realiza judisium iha loron 02 dezembru 2022,” nia akresenta.

Estudante ein jerál ne’ebé ativu iha UNITAL hamutuk 8.000 resin no parte universidade iha ona planu ba tinan akadémiku 2023 atu loke tan prosesu rekrutamentu ba estudante foun hamutuk 2.000 resin tanba iha ona fasilidade sala aula sufisiente atu akumula estudante liu númeru ne’ebé deside ona.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!