RAEOA sei realiza festivál suku Amasat
OÉ-CUSSE, 04 dezembru 2022 (TATOLI) –Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, sei realiza festivál Suku Amasat (suku furak no kapaas) hodi promove identidade kulturál suku 18 ba futuru bele sai suku kreativu, inovativu, independente, inkluziva, saudável no sustentável.
Prezidente Autoridade RAEOA, Arsénio Paixão Bano, informa, festivál ne’e nu’udar polítika ida hosi programa suku Amasat, ho objetivu kada suku sei hatudu produtu lokál, kulturál idéntiku iha suku nu’udar tradisaun orijinál povu Oé-Cusse nian.
Iha tinan 2022 ne’e, Autoridade RAEOA hahú finansia suku sira, liuhosi selebrasaun akordu ida, katak kada suku tenke dezenvolve-aan ho planu estratéjiku iha setór oioin, ho intensaun atu mobiliza komunidade partisipa direita ba prosesu dezenvolvimentu iha suku.
Tanba programa ne’e foin dahuluk RAEOA implementa iha Timor-Leste, presiza enkoraja suku sira atu hahú partisipa iha eventu sira hanesan ne’e, aprezenta kultura kada suku ho nia produtu prioridade suku ne’e saida, nune’e bele iha ona hanoin ba futuru saida mak atu halo iha suku idak-idak.
“Entaun antes iha tama tinan foun, ita hahú promove daudaun liuhosi festivál ne’e ho naran suku Amasat, agora prepara ona iha semana oin ita abertura suku 18 durante loron tolu,” Arsénio Paixão Bano, ko’alia iha Oé-Cusse, sábadu ne’e.
Entretantu, festivál suku Amasat ne’e sei realiza iha hahú iha loron 07 to’o 09 dezembru 2022, ho nia atividade sira maka hanesan;
Primeiru abertura ba esbisaun feira suku Amasat, daruak, konsertu kalan muzikál, sei iha aprezentasaun hosi suku 18 kona-bá solo vokál, dansa kultura, tebe tradisionál (bonet), fashion show, puezia no depois hetan animasaun hosi banda lokál no nasionál.
Datoluk maka, anunsia rezultadu no entrega prémiu ba manán na’in-sira kona-bá implementasaun programa suku Amasat.
Notísia relevante: Autoridade RAEOA selebra akordu ho xefe suku 18 implementa ‘Programa Suku Amasat’
Jornalista: Abílio Elo Nini
Editór: Evaristo Soares Martins
