iklan

EKONOMIA, HEADLINE

BTL, E.P tau prioridade kapitál postu administrativu 48 bele asesu bee-moos

BTL, E.P tau prioridade kapitál postu administrativu 48 bele asesu bee-moos

Prezidente Konsellu Administrasaun BTL, E.P, Carlos Peloi dos Reis. Imajen Tatoli/Francisco Sony

DILI, 05 dezembru 2022 (TATOLI)—Bee Timor-Leste, Empreza Públika (BTL, E.P) tau proridade  ba komunidade kapitál postu administrativu sira bele asesu bee-moos iha tinan 2023.

“Prioridade tinan 2023, ami-nia hakarak kapitál postu administrativu 48 iha territóriu laran tomak ne’ebé dook hosi kapitál munisípiu, hotu-hotu bele hetan ona bee regulár,” Prezidente Konsellu Administrasaun BTL, E.P, Carlos Peloi dos Reis, informa ba Agência Tatoli, liuhosi programa entrevista eskluziva, iha estúdiu Farol, segunda ne’e.

Tuir Dirijente ne’e, esforsu ne’e halo ona iha tinan barak nia laran tanba komunidade barak mak halerik ba bee-moos.

“Ita promove projetu 89 resin, iha tinan ne’e, liga ba bee-moos no saneamentu. Projetu ne’ebé agora la’o hela mak sistema melloramentu iha suku área rurál tolu no kapitál postu administrativu 10, enkuantu projetu 14 iha hela prosesu konkursu públiku no projetu 22 iha prosesu preparasaun ba dezeñu deatalladu. Ami sei halo levantamentu dadus ba kapitál postu rua hanesan Railaco no Maukatar,” nia akresenta.

Notísia relevante: Governu aloka millaun $18 ba BTL, E.P iha OJE 2023

Aleinde ne’e, munisípiu Baucau, Viqueque, Manufahi, Lautém no Dili lansa ona projetu melloramentu infraestrutura, ne’ebé Dili no Baucau konklui ona dezeñu no agora iha prosesu avaliasaun iha Ajénsia Dezenvolvimentu Nasionál (ADN) atu verifika no bainhira fó ona vistu mak hakat ba promosaun iha tinan oin.

Nune’e mós, kona-ba Viqueque, Manufahi no Lautém daudaun dezeñu detalladu iha ona no revee hela, nune’e bainhira hotu mak sei fó ba ADN atu fó vistu no sei implementa iha futuru.

Ba kapitál postu administrativu iha munisípiu neen hanesan Aileu, Ainaro, Covalima, Bobonaro, Ermera no Liquiçá, daudaun iha faze planu mestre, tinan ida-ne’e bele ramata hotu, no tinan oin sei ba faze dezeñu detalladu.

“Tuir ami-nia alvu, trimester dahuluk tinan oin, ita bele halo ona prosesu melloramentu iha postu hotu, nune’e tuir mai bele halo de’it ona manutensaun ba sistema hodi garante bee ba komunidade hotu,” nia reforsa.

BTL, E.P halo levantamentu dadus ba komunidade ne’ebé hela iha área rurál liuhosi proposta hosi komunidade ka líder komunitáriu lokál, nune’e ekipa téknika sira bele responde atu promove melloramentu iha área sira.

“Daudaun ne’e iha área rurál suku tolu mak iha prosesu implementasaun. Espera bele ramata no ita-nia komunidade bele asesu bee-moos, ida-ne’e mak esforsu ne’ebé ita halo maibé presiza komunidade hotu nia kontribuisaun,” nia tenik.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!