DILI, 05 dezembru 2022 (TATOLI)—Bee Timor-Leste, Empreza Públika (BTL, E.P), segunda ne’e, asina kontratu ho empreza Jufado Unipesoál, Lda, hodi halo melloramentu ba sistema bee-moos iha Suai Vila, munisípiu Covalima.
Prezidente Konsellu Administrasaun BTL, E.P, Carlos Peloi dos Reis, hateten, kontratu ne’e ho objetivu halo serbisu melloramentu sistema bee-moos iha Suai Vila, espesífikamente ba suku tolu hanesan Debos, Loro ho Camnasa.
“Sei halo monta kontadór ba uma-kain hamutuk unidade 1.500 no serve populasaun hamutuk 7.500. Ita espera ho kontratu ne’e empreza bele serbisu ho di’ak hodi fornese bee ba komunidade,” Carlos Peloi, hateten iha salaun BTL, E.P, Caicoli, segunda ne’e.
Notísia relevante: BTL, E.P tau prioridade kapitál postu administrativu 48 bele asesu bee-moos
Projetu ne’e hanesan kontinuasaun hosi projetu perfurasaun ne’ebé maka empreza estatál ne’e halo ona iha Suai.
“Signifika, iha ona posu rua no agora ne’e hein de’it kanalizasaun bee-moos ba komunidade iha suku tolu. Orsamentu ne’ebé ohin ita halo kontratu hamutuk $839.334,8 no implementasaun projetu ho durasaun fulan-neen,” nia akresenta.
Iha fatin hanesan, Diretora empreza Jufado Unip Lda, Delfina Amaral Lopes, komprometidu sei finaliza serbisu tuir kontratu ne’ebé iha.
“Ida-ne’e la’os buat foun, empreza garante sei finaliza duni projetu tuir tempu ne’ebé determina. Hanesan empreza, ami mós prontu la’o tuir lala’ok ne’ebé mak iha. Tanba ne’e, hanesan regra ne’ebé kesi empreza no obra na’in. Ami prontu serbisu di’ak nune’e bele fornese bee-moos ba ita-nia komunidade,” nia otimista.
Delfina Amaral kompromete, bainhira projetu ne’e la’o, empreza sei rekruta foin-sa’e sira iha suku tolu hodi halo serbisu.
Jornalista : Arminda Fonseca
Editora : Julia Chatarina
