iklan

EDUKASAUN, HEADLINE

Estudante 3.517 tama lista mellór klasifikadu atu simu prémiu bolsa méritu

Estudante 3.517 tama lista mellór klasifikadu atu simu prémiu bolsa méritu

Estudante Eskola ESJ Finantil partsisipa ezame períodu daruak, iha ESJ Finantil, Ai-mutin, segunda (08/08). Imajen Tatoli/Francisco Sony

DILI, 05 dezembru 2022 (TATOLI)–Ministériu Edukasaun Juventude no Desportu (MEJD) identifika ona estudante 3.517, ne’ebé tama iha lista mellór klasifikadu atu hetan prémiu bolsa méritu.

Diretór Jerál Edukasaun Ensinu hosi MEJD, Luís Manuel Ximenes, hateten, ministériu prepara ona buat hotu ba atribuisaun prémiu bolsa méritu ba alunu sira hosi ensinu báziku to’o ensinu sekundáriu jerál no tékniku vokasionál.

“Prémiu ne’ebé atu atribui ba estudante mellór klasifikadu sira ne’e ha’u seidauk bele fó sai valór, maibé klaru katak prémiu klasifikasaun ba bolsa méritu ne’e la hanesan, sira sei simu iha Banku Nasionál Komérsiu Timor-Leste (BNCTL, sigla portugés),” Diretór informa iha ninia gabinete, MEJD, Vila Verde, segunda ne’e.

Notísia relevante: Estudante 75 hetan bolsa estudu área dezenvolvimentu nasionál iha Portugal no Brazil

Bolsa méritu sei implementa tuir faze ne’ebé determina ona, ne’ebé hosi faze dahuluk haree hosi prosesu pasajen klase primeiru siklu 40 ano ba 50 ano, hafoin segundu siklu hosi 60 ano ba 70 ano, nune’e mós hosi nível ensinu sekundáriu no tékniku vokasionál nian haree hosi pasajen klase 110 ano ba 120 ano nian.

Hosi faze daruak, sei haree hosi rezultadu ezame nasionál, ne’ebé tuir planu sei anúnsia iha loron 09 dezembru 2022 no hosi rezultadu publikasaun ne’e maka Diresaun Jerál Edukasaun Ensinu sei hetan lista hosi diresaun kompetente sira kona-ba estudante mellór klasifikadu ba bolsa méritu sira.

“Prémiu ne’ebé ministériu sei atribui ba estudante sira sei transfere liuhosi sira-nia konta bankária. Lista sira ne’e ministériu sei rekolla hosi Diresaun Servisu Edukasaun Munisipál ida-idak, hafoin submete mai Diretór Jerál Edukasaun Ensinu atu kanaliza ba autoridade kompetente BNCTL hodi prepara konta bankária ba alunu ida-idak tuir munisípiu hafoin sei transfere ba konta bankária estudante sira,” Luís Manuel karesenta.

Atribuisaun prémiu bolsa méritu sei hahú iha fulan-dezembru ne’e, maibé kuandu fulan ne’e la konsege finaliza, maka bele adia ba janeiru.

Jornalista   : Tomé Amado

Editora        : Julia Chatarina

iklan
iklan

2 Comments

  1. Obrigada ba opportunidade Ida ne sai hnsn meius Ida Mai Ami hotu atu bele kapasita Ami nian Liu husi Ami nx kapasidade no konesementu nebe Mak Ami iha .

  2. Obrigada ba opportunidade Ida ne sai hnsn meius Ida Mai Ami hotu atu bele kapasita Ami nian Liu husi Ami nx kapasidade no konesementu nebe Mak Ami iha .

Leave a Reply

iklan
error: Content is protected !!