iklan

DILI, POLÍTIKA

Governu labele altera saláriu désimu terseiru tanba aprova ona iha PN

Governu labele altera saláriu désimu terseiru tanba aprova ona iha PN

Deputada CNRT, Carmelita Caetano Moniz. Imajen/Dok. TATOLI

DILI, 05 dezembru 2022 (TATOLI)—Deputada hosi bankada Congresso Nacional de Reconstrução Timorense (CNRT), Carmelita Caetano Moniz, husu Governu no konsidera saláriu désimu terseiru ba ajente administrasaun públika hanesan funsionáriu públiku no funsionáriu kontratadu termu sertu ne’e direitu no labele altera sira-ne’ebé ho saláriu $500 labele hetan.

Notísia Relevante: Prezidente Repúblika husu ajusta buat balun iha saláriu désimu terseiru

Carmelita Caetano Moniz hateten, Governu labele halo alterasaun tanba osan ba saláriu désimu terseiru ba funsionáriu públiku aprova tiha ona iha iha Orsamentu Jerál estadu (OJE) 2022 hanesan lei ida aprova ona iha Parlamentu Nasionál.

“Primeiru, Governu labele halo alterasaun ba ida-ne’e tanba osan désimu treseiru ka gaji 13 ba funsionáriu públiku aprova tiha ona iha Orsamentu Jerál Estadu (OJE) 2022 ne’ebé hanesan lei ida aprova ona iha Parlamentu Nasionál, entaun Governu tenke aprova fali dekretu-lei ida iha implementasaun,” Deputada CNRT ne’e hateten ba jornalista sira iha PN, segunda ne’e.

Tan ne’e, nia dehan, dekretu-lei labele kontráriu ho lei OJE 2022 no labele hasai tanba ne’e direitu funsionáriu sira-nian ne’ebé sira simu tinan naruk ona.

“Ita halo lei fó benefísia ema no ita labele halo lei atu prezudika ema-nia moris ne’e kontra prinsípiu de direitu no labele halo ida hamenus fali ema-nia direitu ne’e. Sira-nia direitu ba gaji 13 nune’e laiha razaun atu halo ida-ne’e,” nia dehan.

Tuir lei laborál iha artigu 44 subsídiu anuál iha alínea 1 hateten, traballadór iha direitu hodi hetan subsídiu anuál hosi valór la ki’ik liu saláriu mensál ne’ebé empregadór selu to’o loron 20 fulan dezembru, no alínea 2 haktuir kalkulu ba subísidiu anuál ne’e nu’udar proporsionál ba fulan serbisu presta iha kada tinan sívil.

“Lei laborál mós hateten katak traballadór sira iha mós direitu ba gaji 13, fara mais funsionáriu Estadu entaun ida-ne’e fó liután kbiit ba funsionáriu sira atu hetan sira-nia direitu a não ser Governu hateten dehan osan laiha,” Deputada membru komisaun A trata asuntu Justisa no Konstituisional ne’e hateten.

Tuir deputada bankada opozisaun ne’e, kona-ba subsídiu fin do ano $200 ba povu vulneravél no traballadór rendimentu ki’ik ne’e buat ketak ida labele tau hanesan ne’ebé apoiu sosiál ne’ebé Governu hakarak fó.

Deputada Fretilin, Elena Martins, sujere Governu di’akliu haree mak titulár órgaun soberania no asesór sira-ne’ebé mak ho saláriu boot.

Antes ne’e Governu liu hosi reuniaun Konsellu Ministru (KM) extaordináriu iha sesta liu ba aprova ona alterasaun ba diploma iha reuniaun KM iha 09 novembru 2022 kona-ba pagamentu extraordináriu ba saláriu adisionál fulan ida-nian.

Ho alterasaun ne’ebé aprova, funsionáriu no ajente administrasaun públika ka ho kontratu administrasaun provimentu inklui traballadór administrasaun públika kontratadu termu sertu ho saláriu ki’ik hosi $500 no ne’ebé la presta atividade profisionál iha gabinete ministeriál sira sei iha direitu ba pagamentu.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!