iklan

EKONOMIA, HEADLINE

Komunidade Dare no Lahane Osidentál hahú simu Cesta Bázika

Komunidade Dare no Lahane Osidentál hahú simu Cesta Bázika

Empreza fahe produtu Cesta Bázika ba komunidade iha suku Dare, segunda (05/12). Imajen/MTKI

DILI, 05 dezembru 2022 (TATOLI)—Ministériu Turizmu Komérsiu no Industria (MTKI) hahú distribui produtu Cesta Bázika faze daruak ba komunidade suku Dare no suku Lahane Osidentál, postu administrativu Vera Crúz, munisípiu Dili.

“Empreza Marobo Brother, Unipessoal Lda toma-konta ba distribuisaun Cesta Bázika, ho totál orsamentu hamutuk $526.850,” refere nota ne’ebé Agência Tatoli asesu, segunda ne’e.

Suku Dare rasik distribui ba aldeia 10 ho totál benefisiáriu hamutuk 10.537, kompostu hosi aldeia Casnafar ho benefisiáriu 381, Cuolau I 293, Cuolau II 384, Fatunaba 357, Fila Be ba Tua 403, Figuira ka Bouloc 318, Leilaus 333, Lemorana 371, Nahaec 620, no aldeia Suca Lau 279.

Nune’e mós, ba suku Lahane Osidentál rasik, kompostu hosi aldeia 11 maka hanesan aldeia Ainitas Hun ba benefisiáriu 598, Bedois 571, Bela Vista 758, Care Laran 532, Correio 612, Gomes Araujo 506, Mota Ulun 417, Hospital Militar 566, Paiol 708, Rai Cuac 524, no Teca Hudi Laran 1.006.

Notísia relevante: Suku rua iha Vera Crúz simu ona Cesta Bázika

Iha faze distribuisaun, ekipa ne’ebé akompaña distribuisaun identifika produtu balun a’at hanesan manu-tolun maibé hafoin komunika, empreza troka kedas.

Benefisiáriu Costodio da Conceição Mendonça ‘Loro’ nu’udar veteranu, agradese tebes ba Governu tanba iha polítika di’ak hodi fahe subsídiu oin-oin ba povu.

“Ha’u kontente tanba Governu lori produtu mai fahe ba ami no produtu sira ne’e mós barak mak maihosi ita-nia produtu rasik,” nia dehan.

Produtu ne’ebé mak empreza fahe ba benefisiáriu, hosi rai-laran ka produtu lokál 75% no produtu importadu 25%, hamutuk produtu 18 bazeia ba kuotasaun, kompostu hosi produtu ne’ebé kontein proteina, karboidatu inklui produtu ijiene pesoál.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!