DILI, 05 dezembru 2022 (TATOLI)—Governu liuhosi Ministériu Finansa (MF) semana oin sei selebra akordu ho Austrália kona-ba Projetu ‘Timor-Leste Airport Facilities Project’.
“Relata ba Primeiru-Ministru kona-ba Ministériu Finansa serbisu, liu-liu kona-ba asinatura akordu ne’ebé sei halo ho Austrália iha semana oin. Kuandu ita asina ona akordu ne’e signifika katak, ita-nia ai-rin haat ne’e kompleta ona, entaun ita bele hahú ona prosesu aprovizionamentu, konkursu no buat seluk tán hodi harii ona ita-nia Aeroportu Internasionál Comoro,” Ministru Finansa, Rui Augusto Gomes, hafoin reuniaun semanál ho Xefe Governu, iha Palásiu Governu, segunda ne’e.
Nia dehan, tinan oin bele realiza ona konstrusaun ba Aeroportu Comoro tanba kompleta ona akordu ho Austrália. Antes ne’e asina ona ho Banku Dezenvolvimentu Aziátiku (ADB, sigla inglés), Japan International Cooperation Agency (JICA) no Governu mós tau osan.
“Ne’ebé hela de’it asina ho Austrália, hanesan ne’e pakote ba faze dahuluk ne’e kompleta ona. Entaun hahú fulan-janeiru 2023 ne’e bele hahú ona prosesu aprovizionamentu, daudaun halo hela pagamentu uma-kain sira ne’ebé afetadu hosi projetu,” nia akresenta.
Notísia relevante: Governu estabelese valór mínimu akizisaun bens imóveis projetu Aeroportu Comoro
Antes ne’e, Governu liuhosi reuniaun Konsellu Ministru, sesta (02/12), delibera ona atu autoriza Ministru Finansa, Rui Agusto Gomes, hodi selebra akordu ida ba finansiametu ho Australia e Export Finance Australia kona-ba Projetu ‘Timor-Leste Airport Facilities Project’.
Akordu ne’e prevee kontribuisaun finaseira ida entre Austrália ba Timor-Leste ho valór millaun $28,36 no kontratasaun empréstimu ho valór millaun $45, ho períodu maturaridade tinan 25, hodi finansia projetu dezenvolvimentu Aeroportu Internasionál Prezidente Nicolau Lobato.
Jornalista : Antónia Gusmão
Editora : Julia Chatarina
