iklan

EDUKASAUN, HEADLINE

MEJD sei halo pagamentu ba empreza lima

MEJD sei halo pagamentu ba empreza lima

Konstrusaun sala tolu no sentina ida iha Eskola ESJ Calixa liuhosi projetu komunitáriu, iha suku Uma Quic, sesta (23/09). Imajen Tatoli/Vitorino Lopes da Costa

DILI, 05 dezembru 2022 (TATOLI)–Ministériu Edukasaun Juventude no Desportu (MEJD) prepara ona prosesu pagamentu ba empreza lima ne’ebé asume responsabilidade ba projetu kapitál dezenvolvimentu ba projetu komunitáriu tanba hetan ona verifikasaun hosi Ajénsia Dezenvolvimentu Nasionál (ADN).

“Ba projetu kapitál dezenvolvimentu. Ita iha projetu 21 maka identifikadu no submete ona pedidu ba Ajénsia Dezenvolvimentu Nasionál hodi halo verifikasaun. Iha ona empreza lima maka finaliza ona prosesu verifikasaun no agora haruka filafali ona mai ministériu hodi halo pagamentu,” Diretór Nasionál Dezenvolvimentu Parke Eskolár hosi MEJD, Augusto Soares, informa ba Agência Tatoli, via telefónika, segunda ne’e.

Notísia relevante: Proposta pagamentu empreza responsável projetu komunitáriu to’o de’it novembru

Daudaun ne’e, ADN sei halo prosesu verifikasaun ba projetu 16, nune’e Diretór espera tempu besik bele konklui tan hodi hetan pagamentu.

“Hosi Ministériu Finansa rasik informa ona katak prosesu pagamentu ba projetu konstrusaun sira sei taka iha loron 23 dezembru 2022. Semana ne’e ita bele hahú ona pagamentu ba empreza sira ne’ebé ramata ona verifikasaun no balun ne’ebé seidauk ita sei hein tan rekomendasaun hosi ADN,” nia akresenta.

Valór pagamentu ne’ebé sei halo, tuir Diresaun Nasionál Dezenvolvimentu Parke Eskolár katak depende ba rezultadu verifikasaun ne’ebé maka ADN halo ona, ho rezultadu verifikasaun ne’ebé submete ba MEJD bazeia ba tékniku sira-nia kalkulasaun iha fatin konstrusaun.

Kona-ba projetu komunitáriu 202 ne’ebé la’o hela iha territóriu nasionál,  iha ona projetu 32 maka atinje ona 100% no tuir planu sei inaugura iha fulan ne’e, enkuantu projetu seluk to’o tinan nia rohan kuaze atinje hotu ona 70% ba leten.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!