EDUKASAUN, HEADLINE

Proposta pagamentu empreza responsável projetu komunitáriu to’o de’it novembru

Proposta pagamentu empreza responsável projetu komunitáriu to’o de’it novembru

Konstrusaun sala tolu no sentina ida iha Eskola ESJ Calixa liuhosi projetu komunitáriu, iha suku Uma Quic, sesta (23/09). Imajen Tatoli/Vitorino Lopes da Costa

DILI, 27 novembru 2022 (TATOLI)–Diretór Nasionál Dezenvolvimentu Parke Eskolár (DNDPE) hosi Ministériu Edukasaun Juventude no Desportu (MEJD), Agostinho Soares, relata, proposta pagamentu ba empreza responsável projetu komunitáriu to’o de’it novembru ne’e ramata.

“Ita simu ona karta sirkulár ne’ebé hasai hosi Ministériu Finansa (MF) no Ajénsia Dezenvolvimentu Nasionál (ADN) iha loron 24 outubru, katak durasaun tempu ba empreza inklui grupu komunitáriu atu submete proposta pagamentu to’o de’it loron 30 novembru tanba loron 23 dezembru pagamentu hahú ona,” Diretór informa ba Agência Tatoli, via telefónika, domingu ne’e.

Notísia relevante: Progresu projetu komunitáriu Eskola ESJ Calixa atinje 26,8%

Tuir Agostinho Soares, daudaun ne’e iha empreza barak mak submete ona proposta hodi Governu bele prosesa sira-nia direitu pagamentu.

Iha projetu komunitáriu 202 mak la’o hela iha territóriu nasionál, maibé iha 189 maka tama ona iha pagamentu faze daruak no balun tama ona pagamentu faze datoluk. Enkuantu, ADN sei halo prosesu verifikasaun ba projetu komunitáriu 11.

“Hosi projetu komunitáriu 202 ne’e rasik, iha projetu 13 maka atinje 25%, maibé projetu balun mosu dezentendimentu entre grupu komunitáriu ho badaen. Iha mós projetu ualu ne’ebé atinje ona 25% iha atrazu no foin maka hahú filafali iha fulan-agostu klaran,” nia akresenta.

Hosi projetu 189 ne’e rasik ninia progresu fíziku atinje ona 59 to’o 70%, enkuantu hosi projetu 39 ninia progresu atinje ona 89% no iha projetu rua de’it maka konklui ona.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!