COVALIMA, 05 dezembru 2022 (TATOLI)–Koodenadór eskola Laen Tolu, Fernando António, informa progresu implementasaun projetu komunitáriu ba konstrusaun eskola filiál Laen Tolu iha suku Suai Loro, aldeia Loro, postu administrativu Suai, munisípiu Covalima atinje ona 60%.
Notísia Relevante: Proposta pagamentu empreza responsável projetu komunitáriu to’o de’it novembru
“Progresu konstrusaun projetu kominitáriu eskola filiál Laen Tolu, tuir avaliasaun hosi ita-nia enjiñeiru lokál sira katak konstrusaun atinje ona 60%, tanba konstrusaun oras ne’e daudaun takazinku hotu ona,” Fernando António relata progresu ne’e konstrusaun ne’e ba Agência Tatoli, iha Covalima.
Bazea ba kontratu hosi programa konstrusaun no reabilitasaun infraestrutura edukativa (PKRIE) loloos konstrusaun finaliza ona iha loron (28 jullu 2022) maibé to’o ohin loron seidauk finaliza konstrusaun, tanba prosesu transferénsia orsamentu ba faze daruak tarde entaun fó impaktu ba konstrusuan eskola refere.
Konstrusaun eskola filiál Laen Tolu ne’ebé lokaliza iha aldeia Loro, suku Suai Loro ne’e ho sala tolu kompleta edifísiu no sintina ida-ne’ebé ho totál orsamentu $128.627.66.
Hosi orsamentu ne’e faze dahuluk foti 50% no faze daruak mós 50% to’o finaliza halo konstrusaun hodi bele inaugura eskola ne’e.
Antes ne’e, iha loron 07 fulan-outubru tinan 2021, Vise Ministru Edukasaun Juventude no Deportu, António Guterres, asina kontratu ho grupu komunitária atu konstrui no reabilita eskola 15 iha munisípiu Covalima.
Orsamentu reabilita no konstrusaun eskola 15 iha munisípiu Covalima ne’e mai hosi Orsamentu Jerál Estadu tinan fiskál 2021 ne’ebé prevee iha transferénsia públika hamutuk millaun $1,6 grande projetu orsamentu mai hosi rubrika kapital dezenvolvimentu ne’ebé konstrui KAFE haat (4).
Jornalista : Celestina Teles
Editór : Cancio Ximenes
