iklan

HEADLINE, MUNISÍPIU, VIQUEQUE

Sentru saúde Uatulari rejista moras ISPA 7.430 iha janeiru-dezembru

Sentru saúde Uatulari rejista moras ISPA 7.430 iha janeiru-dezembru

Ilustrasaun IRA. Imajen/Espesiál

VIQUEQUE, 05 novembru 2022 (TATOLI)—Sentru saúde Uatulari, munisípiu Viqueque, rejista moras Infesaun Vias Respiratóriu Aguda (ISPA) hamutuk 7.430, hosi fulan-janeiru to’o dezembru 2022.

“Moras ISPA rejista ho númeru a’as tanba impaktu hosi bai-loron hodi hamosu rai-u’ut no afeta ba komunidade. Entaun pasiente sira mai halo tratamentu iha sentru no postu sira, ami-nia pesoál saúde sira fó ai-moruk, ikus mai sira di’ak fali ona,” Xefe sentru saúde postu Uatulari hateten iha sentru saúde Uatulari, segunda ne’e.

Aleinde ne’e, sentru saúde mós rejista moras seluk hanesan kazu bronkuspnoumonia 842, pnoumonia 372, disentri 82 no moras seluk 8.703.

Kazu emerjénsia ne’ebé tama iha sentru saúde Uatulari durante fulan-11 hamutuk 571, baixa 144, alta 101, transfere ba internamentu Viqueque 53 no mate hitu.

Notísia relevante: Sentru Saúde Ermera Vila rejista pasiente ISPA 5.613

Postu Uatulari  iha sentru saúde 12 ne’ebé instala iha suku neen hodi bele halo atendimentu ba komunidade.

“Durante ne’e ami hasoru dezafiu hanesan menus stock ai-moruk analgesik, anti-piretik no anti-biótiku maka daudaun ne’e menus iha sentru saúde. Nune’e ami halo ona pedidu ba munisípiu hodi hato’o ba nasionál,” nia akresenta.

Difikuldade seluk ne’ebé sentru saúde hasoru bainhira halo atendimentu maka eletrisidade mate lakan no presiza ar kondisionadu iha armazen ai-moruk.

Sentru saúde Uatulari iha pesoál saúde 78, maibé sei menus pesoál saúde ba área farmásia, parteira no médiku.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!