EBC Dom Caileto prenxe valór ezame ho surat-tahan
BOBONARO, 05 dezembru 2022 (TATOLI) – Diretór Ensinu Báziku Sentrál (EBC, sigla portugés), Dom Caileto, postu administrativu Bobonaro, munisípiu Bobonaro, Daniel da Cruz, informa manorin na’in sira obrigatóriu tenke prenxe valór ezame estudante kuaze 900 resin ho surat-tahan tanba seidauk hetan distribuisaun kaderneta eskolár permanente hosi Ministériu Edukasaun, Juventude no Desportu (MEJD).
Nia dehan, númeru estudante hirak-ne’e komposta hosi primeiru no segundu siklu ne’ebé mai hosi eskola Filiál sira hanesan Dom Ai-Asa, MaZop, Odelgomo, Oalgomo, Lalebol no ensinu báziku Filiál Kaboke.
Notísia relevante: MEJD prodús ona kaderneta 40.000 ba estudante ensinu báziku
“Durante ne’e ami falta kaderneta permanente, bainhira prenxe valór ezame primeiru períodu to’o pasajen klase sira dezaraska kópia de’it depois tau valór iha surat-tahan fó ba estudante kuaze 900-resin,” nia informa ba jornalista Tatoli, iha suku Bobonaro Vila, tersa ne’e.
Diretór ne’e konsidera, surat tahan mutin ne’e la seguru bainhira distribui ba estudante sira atu lori fila ba uma, maibe profesór turma sira hola inisiativa prenxe fali valór ezame iha ida-idak nia nota, nune’e bainhira kederneta provizóriu ne’e lakon ka dodok, bele haree fali valór ne’ebé asegura hela.
Hafoin ne’e mak bele prenxe valór ba kaderneta orijinál bainhira hetan ona distribuisaun ministériu tutela.
Kestaun ne’e sempre hato’o beibeik proposta ba diresaun Servisu Edukasaun Munisípiu Bobonaro maibé to’o agora seidauk hetan rezultadu.
“Sira dehan mai ami hosi nasionál mai mak atraja, talvez sira dehan iha lojístika mak laiha, dalaruma haruka ami mak direitamente ba foti iha Ministériu Edukasaun, maibé ami eskola ne’e hatene ona, kestaun transporte ita labele ba tanba ne’e responsavél lojístika edukasaun munisipál nian,” nia kestiona.
Tuir dadus totál estudante EBC Dom Caileto hahú hosi primeiru to’o terseiru siklu na’in-1069 komposta hosi mane 515 no feto 554.
Notísia relevante: MEJD sei introdús kaderneta eskolár foun ba nível ensinu báziku
Jornalista : Sérgio da Cruz
Editór : Evaristo Soares Martins
