COVALIMA, SAÚDE

Vasina Pfizer doze dahuluk iha Covalima atinje ona 94,4%

Vasina Pfizer doze dahuluk iha Covalima atinje ona 94,4%

Pesoál Saúde fó vasina Pfizer ba estudante Eskola Cristal, sesta (05/11). Imajen TATOLI/António Gonçalves

COVALIMA, 06 dezembru 2022 (TATOLI)—Diretora Servisu Saúde Munisípiu Covalima, Maria de Fátima Moniz informa, vasina Pfizer doze dahuluk ba labarik sira ho idade 12 menus hosi 18 iha Covalima atinje ona 94,4% no ekivalente ba númeru hamutuk 9216.

Notísia Relevante: Populasaun 16,961 iha Covalima simu ona vasina Booster Pfizer

Servisu Saúde Munisípiu Covalima, Maria Fatima Moniz. Imajen Tatoli/Celestina Teles.

“Pesoál saúde sira hala’o atividade iha suku no aldeia sira lori vasina Pfizer ba estudante nafatin ita lori tanba vasina Pfizer ita kobre ba doze dahuluk ne’e atinje ona 94,4% no ekivalente númeru 9216, doze daruak ita atinje ona 78% no ekivalente ba númeru hamutuk 7,775,” Maria de Fátima Moniz informa ba Agência Tatoli, iha nia kna’ar fatin Camanasa, tersa ne’e.

Ho númeru vasina ne’ebé mak iha pesoál saúde sira kontinua esforsu liuhosi estratéjia oioin halo advókasia ho autoridade sira vasina COVID-19 integra ba vasina rutina.

“Ami esforsu hela servisu saúde munisípiu liuhosi estratéjia oioin halo advokasia ho autoridade lokál ne’ebé vasina COVID-19 integra ona ba iha vasina rutina, ami tun tenke koordena ho sira hodi halo mobilizasaun ba komunidade tantu vasina sarampu nian, póliu no mós booster Pfizer,” nia dehan.

Ho esforsu hosi pesoál saúde sira foin lalais konsege finaliza no utiliza ona vasina ho vial 300-resin no haruka ona pedidu ba iha nasionál haruka mai ona vasina vial 195.

“Ami nafatin esforsu. Foin lalais estoke vasina vial 300-resin ita ezekuta hotu ona no ami halo pedidu ba iha nasionál ita halo ona distribuisaun vasina vial 195,” nia hateten.

Hosi vasina vial 195 ne’e distribui ona ba sentru saúde sira hanesan ba sentru saúde Fatululik vial 10, Fatumea vial 15, Fohorem 25, Maucatar 25, Tilomar 25, Zumalai 50 no Suai vial 50.

Aleinde informa kona-ba progresu vasina Pfizer nia mós informa vasina Booster sidadaun sira-ne’ebé simu ona imunizasaun Booster ne’ebé atinje ona 44,5% ne’ebé ekivalente ho númeru 18,167.

Pesoál saúde sira atinje ona númeru 18,167 tanba vasina COVID-19 integra ona ba vasina rutina nune’e konsege atinje ona 44,5%.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!