iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU, POLÍTIKA

Xefe família 484 iha Bobonaro Vila sei simu subsídiu $200

Xefe família 484 iha Bobonaro Vila sei simu subsídiu $200

Xefe suku Bobonaro Vila, Domingos Belo. Imajen Tatoli/ Sérgio da Cruz.

BOBONARO, 06 dezembru 2022 (TATOLI) – Xefe suku Bobonaro Vila, postu administrativu Bobonaro, munisípiu Bobonaro, Domingos Belo, fó-sai katak, xefe familia hamutuk na’in-484 sei simu subsídiu fim do ano $200 ne’ebé Governu liuhosi Ministériu Solidariedade Sosiál no Inkluzaun sei lansa iha munisípiu refere iha tempu badak.

Benefisiáriu hirak-ne’e mai hosi aldeia tolu komposta hosi aldeia Lactil na’in-171, Lesigatál 69 no aldeia Tuluata 237 inklui fámilia foun hitu.

Notísia relevante: Aban, Governu sei lansa pagamentu subsídiu $200 iha Dili

“Ita haree ba pasadu Covid-19 ne’e ami iha 477, maibé foin daudaun ha’u ba Dili iha informasaun hosi sosiál katak iha aumenta porvolta xefe familia hitu, ne’ebé kobre ona 484 mak atu hetan subsídiu ne’e,” nia informa ba jornalista Tatoli, iha kna’ar fatin, Bobonaro, tersa ne’e.

Nia agradese VIII governu konstitusionál tanba kontinua implementa programa ne’e hodi responde povu nia nesesidade no hakbit rendimentu ekonomia família nian.

“Ha’u haree programa ida-ne’e di’ak, ida-ne’e hanesan atu redús rendimentu ekonomia mínimu ne’ebé povu hasoru, tanba difikuldade barak hanesan tempu agora, ita haree ba klimátika Bobonaro mós krize hahán,” nia katak.

Prosesu pagamentu ba subsídiu ne’e, MSSI serbisu hamutuk ho Banku Nasionál Komérsiu Timor-Leste (BNCTL, sigla portugés) sei transporta osan ba postu administrativu sira, hafoin autoridade munisipál ho ekipa pagamentu sei ba foti osan ne’e hodi ba iha suku hanesan fatin ba pagamentu nian.

“Ha’u hanesan xefe suku prontu koopera ho ekipa pagamentu tanba ida-ne’e ami-nia kna’ar, ne’ebé ami sei apoiu to’o remata ho susesu tanba ne’e osan estadu nian,” Xefe suku Domingos promete.

Notísia relevante: Xefe suku Tapo husu MSSI konsidera reklamante 25 iha subsídiu $200

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!