Ekipa pagamentu subsídiu $200 dezloka ba munisípiu

DILI, 09 dezembru 2022 (TATOLI)–Vise Ministra Solidariedade Sosiál no Inkluzaun(MSSI) , Signi Verdial, sesta ne’e, halo despedida ho ekipa pagamentu subsídiu fim do ano $200 ba uma kain iha territóriu nasionál atu dezloka ba munisípiu sira iha territóriu nasionál.
Notísia Relevante: Aban, Governu sei lansa pagamentu subsídiu $200 iha Dili
“Ekipa pagamentu subsídiu fim do ano $200 ne’ebé prepara daudaun ona atu dezloka ba munisípiu 13, hodi hala’o pagamentu ba beneffisiáriu subsídiu $200 ba uma kain iha teritóriu nasionál,” Vise MSSI ne’e hateten liuhosi komunikadu imprensa ne’ebé Agência Tatoli asesu, sesta ne’e.
Vise-Ministra ne’e apresia tebes ba ekipa Sekretariadu Programa Subsídiu Fim do Ano ba uma kain tanba ba esforsu koletivu ne’ebé únidu hodi realiza programa pagamentu subsídiu fim do ano $200 ba benefisiáriu sira.
“Husu ba ekipa pagamentu no koordenadór munisípiu sira atu nafatin halo komunikasaun ne’ebé di’ak, firme nafatin iha ekipa ida-ne’ebé forte entre MSSI no Ministériu Administrasaun Estatál (MAE), hodi bele hala’o pagamentu ho di’ak iha fatin pagamentu,” nia hateten.
Diretór Jerál MSSI, Florêncio Pina Dias Gonzaga hateten, importante servisu hamutuk hodi apoiu malu nune’e bele hala’o pagamentu ho di’ak no bele termina iha kalendáriu ne’ebé termina fulan dezembru ne’e nia laran.
“Husu ba ekipa pagamentu hotu-hotu, karik hasoru difikuldade ruma bele hato’o ba iha Koordenadór Munisípiu ida-idak nian, nune’e ita buka nia solusaun,” nia dehan.
Notísia Relevante: MSSI husu membru família saláriu liu $500 rezeita simu subsídiu $200
Jornalista : Osoria Marques
Editór : Cancio Ximenes

