Kompañia Jufado hahú halo melloramentu sistema bee-moos iha Covalima
COVALIMA, 09 dezembru 2022 (TATOLI)–Koordenadór BTL, E.P Covalima, Castro Dodi Ramos informa, kompañia Jufado Unipesoál. Lda, hahú halo melloramentu ba sistema bee-moos tuan iha área urbana, munisípiu Covalima.
Notísia Relevante: BTL,E.P Covalima rekolla reseita rihun $10-resin ba kofre Estadu
Nia hatutan, maske BTL, E.P rasik aplika ona tarefa ba kliente sira-ne’ebé halo ona instalasaun bee-moos, maibé BTL, E.P mós kontinua simu keisa hosi kliente sira tanba seidauk asesu bee-moos ho di’ak.
“Ita-hotu hatene iha área urbana kliente barak sei hato’o keisa nafatin asesu bee-moos seidauk normál no BTL, E.P rekoñese liu-liu parte zona tres ho kuatru fornese bee seidauk normál. Maibé ita agradese foin lalais kompañia Jufado sai manán-na’in ba projetu atu halo melloramentu sistema bee-moos tuan ne’ebé asina ona kontratu ho BTL, E.P sentrál,” Castro Dodi Ramos hateten ba Agência Tatoli, iha nia kna’ar fatin Sukaer Laran, Covalima, sesta ne’e.
Kompañia jufado hahú halo ona melloramentu ba sistema bee-moos tuan iha covalima espesial iha área urbana. Nune’e fiar katak ho obra kompañia bele rezolve problema bee-moos iha área urbana.
Tuir mapamentu, kompañia Jufado halo melloramentu ba sistema bee-moos tuan sei kobre hotu iha área urbana.
Bazea ba kontratu, kompañia Jufado asina kontratu ho BTL, E.P halo melloramentu sistema bee-moos tuan ne’e iha área urbana ho nia durasaun tempu fulan neen (6) no sei ativa hikas mós bee-matan foun rua.
“Ita sei ativa fali bee-matan foun rua parte Ladi no Sukabilaran. Ho obra ne’e, ita fiar bele halo mudansa uitoan iha área urbana liu-liu iha postu administrativu Suai,” nia hateten.
Tuir dadus ne’ebé Agência Tatoli asesu hosi BTL, E.P, uma kain 1,665 asesu ona bee-moos ho totál populasaun 10,965 ne’ebé hela iha área urbana munisípiu Covalima.
Jornalista : Celestina Teles
Editór : Cancio Ximenes
