DILI, 09 dezembru 2022 (TATOLI)— Governu liuhosi Ministériu Turizmu, Komérsiu no Indústria (MTKI), kontrata kompañia Sayunolia 1108 Unipessoal Lda, hodi distribui ona produtu Cesta Bázika ba komunidade aldeia lima hosi suku Bairru-Pite, postu administrativu Don-Aleixo, munisipíu Dili.
Diretora Kompañia Sayunolia 1108 Unipessoal Lda,Yuliana Alay, hateten, benefisiáriu aldeia lima hosi suku Bairru-Pite ne’ebé simu Cesta Bázika na’in-4.977.
“Aldeia lima hosi suku Bairru-Pite mak hanesan aldeia 5 de outobru ho benefisiáriu 1.147, aldeia Andevil benefisiáriu 495, aldeia Avansa 1.151, aldeia Bita-Ba benefisiáriu 1.029 no aldeia Buka Fini benefisáriu 1.155”, hateten Yuliana Alay liuhosi nota ne’ebé Agência Tatoli asesu sesta ne’e.
Hafoin manán konkursu públiku MTKI kontrata, sira halibur produtu bazeia ba komprimentu produtu lokál 75% no 25% maka produtu importadu, atu aselera prosesu halibur sosa produtu hirak ne’e, empreza fó servisu ba timoroan mane no feto kuaze 30 resin hodi prepara produtu.
Iha distribuisaun Cesta Bázika refere, tipu balun kona-ba bá naan kompañia oho iha kedas fatin distribuisaun, no empreza mós responsabiliza transporta ka tula hela komunidade nia kabazes ba ida idak nia rezidénsia.
“Produtu lokál ne’ebé ami fahe sosa iha rai-laran hanesan manutolun ami sosa hosi Loes, koto no batar ikis sosa hosi Lolotoe, fehuk ropa, modo no aifuan ami sosa hosi merkadu Taibessi, foos no karau ami sosa hosi Suai no barak liu ami sosa iha Hera, ba karau kuaze 30 hodi fahe ba komunidade, hanesan emprezáriu sente kontente tebes ho programa ne’e tanba maioria sosa produtu lokál ne’e hanesan motivasaun ida ba agrikultór sira hodi hakaas-an filafali hasa’e produsaun alimentar tanba produtu lokál la sufisiente”.
Iha biban hanesan, Xefe aldeia 5 de Outobru, Orlando da Costa afirma, programa Sesta Bázika bá faze daruak nian ne’e di’ak tebes, tanba maioria produtu hosi rai laran.
“Ha’u haree katak programa Sesta Bázika tinan ne’e di’ak tebes, tanba nia benefisiu diretamente ba komunidade sira, bá hau-nia komunidade produtu item 18 ne’ebé maka kompaña fahe maioria 75% maihosi rai-laran, tanba ne’e ha’u haree nia impaktu di’ak tebes tanba polítika ida uluk dehan “povu Kuda Governu sosa” agora komunidade kuda governu sosa fahe fali ba komunidade,” Orlando da Costa, hateten.
Nu’udar lideransa komunitáriu, nia parte sujere ba Governu atu bele implementa nafatin programa ne’e kada tinan, tanba subsídiu ne’e di’ak hodi ajuda tebes komunidade.
“Ha’u hanesan lideransa komunitáriu agradese no orgullu tebes ba Governu ida ne’e, tanba liuhosi programa Cesta Bázika bele atende nesesidade komunidade nian,” nia akresenta.
Jornalista : Arminda Fonseca
Editór : Florencio Miranda Ximenes
