BAUCAU, 09 dezembru 2022 (TATOLI) – Projeitu reabilitasaun estrada diresaun Uai-aka, postu administrativu Quelicai ba Nahareka, postu Ossu munisípiu Viqueque sei fasilita turista sira vizita fatin turismu iha foho matebian.
Vise Ministru Obra Públika, Nicolau dos Reis, esplika, projetu refere hahú halo estudu no dezeñu detallu iha tinan-2020 ne’ebé responsável hosi kompañia konsultór Liceles liuhosi konkursu públiku ho totál orsamentu $499.605 no finaliza iha setembru tinan-2021.
“Projetu ida-ne’e atu mellora asesu rodaviáriu iha Uai-aka, Quelicai kobre hosi munisípiu, postu administrativu to’o aldeia no bele atrai turista sira bele hakat mai foho matebian,” Vise Ministru Obra Públika hateten iha Uai-aka, suku Abafala, sesta ne’e.
Pontu importante tolu hosi projetu refere hanesan fornese asesu rodaviáriu ne’ebé seguru, redús tempu durante halo viajen, fó empregu serbisu ba komunidade iha área Uai-aka, Quelicai.
Projetu refere hetan verifikasaun hosi Ajénsia Dezenvolvimentu Nasionál (ADN) no hetan aprovasaun hosi Konsellu Administrasaun Fundu Infraestrutura (KAFI) no aprova hosi Konsellu Ministru antes submete ba Komisaun Nasionál Aprovizonamentu (CNA, sigla Portugés) hodi halo konkursu públiku ne’ebé remata iha fulan-setembru 2022.
“Prosesu verifikasaun hotu ona, iha tempu badak sei halo kompensasaun ba iha ita-boot sira-ne’ebé afeta ba obra ida-ne’e,” Nicolau dos Reis akresenta.
Estrada postu Quelicai ho distánsia kilómetru 22.7 no luan metru 7, komposta hosi aspal metru 4, alargamentu metru 1 no ombru metru 2, dreiinajen, moru protesaun, sinál tráfegu no kuda ai-oan ba fatin ne’ebé risku.
Diresaun Nasionál Estrada, Ponte no Kontrolu Cheias hosi Ministériu Obra Públika (MOP) aloka orsamentu hosi fundu infraestrutura tinan fiskál 2022 hamutuk $16.547.661,76.
Durasaun ba reabilitasaun estrada refere fulan-18 ne’ebé responsável hosi kompañia Chongqing Internasional Construction no supervizaun hosi kompaña PY konsep perunding Sdn Bhd hosi Malázia ho durasaun kontratu fulan-18 no tótal orsamentu $ 452.122.00.
Xefi aldeia Lela, suku Abafala, postu Quelicai, Vitorino Manuel Ximenes Freitas, sente kontente no prontu kontribui tanba bele reabilita ona estrada diresaun postu Quelicai to’o Nahareka, postu Ossu ne’ebé bele fasilita komunidade lori produtu ba merkadu.
Tótal komunidade ne’ebé afeta ba projetu reabilitasaun estrada refere hamutuk uma-kain 379 no sei fó orsamentu hamutuk $487.533,65.
Notísia relevante: PM Taur lansa fatuk dahuluk reabilita estrada Quelicai no Baguia
Jornalista : Natalino Belo
Editór : Evaristo Soares Martins
