DILI, 10 dezembru 2022 (TATOLI)–Prezidente Repúblika (PR), José Ramos Horta, sesta (09/12) ne’e loke fórum emprezariál Timor-Leste, ne’ebé organiza hosi Governu Timor-Leste liuhosi TradeInvest hamutuk ho Kámara Komérsiu no Indústria Singapura (SCCCI, sigla inglés), iha edifísiu SCCCI.
“Fórum investimentu ne’e susesu boot tamba kuaze investidór 100 resin mak partisipa. Normalmente tuir ema balun dehan katak investidór interesadu sira ne’ebé mai partisipa ne’e, mai hosi rai seluk ne’ebé investe iha Singapura, iha aprezentasaun di’ak tebes hosi Timor-Leste, liuliu TradeInvest no Autoridade Nasionál Petróleu no Minerál (AMPN), Kámara Komérsiu Indústria Timor-Leste (CCI-TL, sigla portugés) inklui reprezentante investidór ne’ebé investe ona iha Timor. Ema hotu tuir no haree ho kontente tebes,” Xefe Estadu hateten liuhosi nota imprensa ne’ebé Agência Tatoli asesu, sábadu ne’e.
Notísia relevante: PR Horta-PR Singapura diskute kona-ba Timor-Leste tama ASEAN
Investidór internasionál 100 resin ne’ebé partisipa iha eventu ne’e mai hosi Singapura no seluk hosi Europa, ne’ebé iha interese atu investe iha Timor-Leste.
Tuir Xefe Estadu, vizita ne’e iha reasaun di’ak hosi Prezidente Repúblika no Primeiru-Ministru Singapura no sai hanesan reforsu ida ba investimentu no adezaun Timor-Leste ba Asosiasaun País Sudeste Aziátiku (ASEAN, sigla inglés).
Aleinde ne’e, PR defende nesesidade hadi’a setór judisiáriu hodi bele garante seguransa ba investimentu iha rai-laran.
Durante aprezentasaun, TradeInvest introdúz kona-ba razaun Timor-Leste dada investidór no balansu durante tinan 20 nia laran.
Hafoin ida-ne’e, iha mós aprezentasaun hosi empreza internasionál ne’ebé investe ona iha Timor-Leste hanesan Bolloré, East Timor Trade, Timor Plaza, inklui CCI-TL.
Aprezentasaun ikus liu hosi ANPM hodi esplika kona-ba prosesu investimentu iha Greater Sunrise ne’ebé daudaun ne’e iha ona akordu atu dada mai Timor-Leste.
Hafoin partisipa iha fórum emprezariál, Prezidente Repúblika hamutuk delegasaun kontinua vizita projetu NEWater, nu’udár projetu transformasaun bee foer ba bee-moos.
‘’Singapura halo resiklajen bee, ne’ebé bee hotu hosi dapur, haris fatin, no udan been ne’e hotu sira aproveita halo resiklajen atu sai be konsumu ba ema hotu, ne’e hanesan teknolojia ida komplikadu tebes no karun. Ha’u la fiar ita bele halo, maibé ita ba atu haree. Kondisaun ne’e hatudu líder Singapura sempre buka solusaun ruma ba dezafiu ne’ebé Singapura rasik no mundu enfrenta, tanba ne’e ita buka halo relasaun metin liután, nune’e bele halo kapasitasaun ba funsionáriu hotu,” PR Horta tenik.
Xefe Estadu nota katak Singapura hanesan rai kiik ne’ebé avansadu no iha infrastrutura konservasaun bee no ambiente relasiona ho akesimentu globál.
Jornalista : Nelson de Sousa
Editora : Julia Chatarina
