DILI, POLÍTIKA

Virgílio Guterres ‘Lamukan’ eleitu sai Provedór PDHJ períodu 2023-2026

Virgílio Guterres ‘Lamukan’ eleitu sai Provedór PDHJ períodu 2023-2026

Virgílio da Silva Guterres “Lamukan”. Imajen Tatoli/Francisco Sony.

DILI, 12 dezembru 2022 (TATOLI)—Parlamentu Nasionál (PN) liuhosi eleisaun sekretu hili kandidatu Provedór Direitu Umanu no Justisa (PDHJ, siglá portugés), Virgílio da Silva Guterres ‘Lamukan’ sai provedór PDHJ ba períodu 2023-2026.

Notísia Relevante: PN adia eleisaun ba kandidatu provedór PDHJ

Iha votasaun daruak kandidadu Ivo Colimau Lay Costa ho votu 29 no Virgílio da Silva Guterres ho votu 34, nune’e atuál Prezidente Conselho de Imprensa (CI), Virgílio da Silva Guterres, mak eleitu ba Provedór PDHJ ba mandatu tinan haat.

“Parabéns ba Virgílio da Silva Guterres eleitu Provedór  Direitu Umanu no Justisa, parabéns mós ba Deputadu sira hotu tanba ita konsege eleze Provedór PDHJ kargu importante iha ita-nia Estadu direitu demokrátiku ba tomada pose hein avizu hosi meza,” Prezidente PN ne’e hateten liu-hosi reuniaun  plenária, segunda ne’e.

Antes ne’e, iha aprezentasaun kandidatu ne’e iha kandidadtu na’in-lima mak kompete iha eleisaun ne’e, ne’ebé iha votasaun dahuluk hanesan kandidatu  Osorio Almeida hetan votu  haat (4), Carmen Joela Perreira votu ida (1), Virgílio Guterres ‘Lamukan’,  votu 27, Ivo Colimau Lay Costa votu 29, Nelson Pilomeno Rego de Jesus ho votu 0, ho deputadu prezente 63 no auzente na’in-rua no votu nulu rua (2).

Antes eleisaun Prezidente PN, Aniceto Longuinhos Guterres Lopes, fó sai katak kandidatu sira ne’e prenxe hotu kriteira hotu ne’ebé hato’o rekerementu individuál nune’e prosede ba votasaun.

Ho nune’e, meza anúnsiu rezultadu votasaun ba Provedór Direitu Umanu no Justisa (PDHJ) votu 63 kada kandidatu nia votu mak anúnsiu ne’e.

“Agora ita ba iha artigu 12 lei númeru 7/2004, 26 maiu kona-ba PDHJ, artigu 12 númeru 1 Parlamentu Nasionál designa Provedór PDHJ por maiória absoluta votu hosi deputadu efetividade funsaun. Entre kandidatu na’in-lima laiha ida mak hetan votu maiória absoluta  ita tama ba segunda volta,” Prezidente PN hateten.

Nune’e, hakat ba votasaun daruak kandidadu Ivo Colimau Lay Costa ho votu 29 no Virgílio da Silva Guterres ho votu 34.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!