DILI, 13 dezembru 2022 (TATOLI) – Universidade Nasionál Timor Lorosa’e (UNTL) iha ona planu ba tinan oin 2023 sei hari tán fakuldade turizmu no arte ho intensaun atu promove siénsia no peskiza inklui atu halo mós estudu ida kle’an ba kultura timor nian iha territóriu nasionál.
Reitór Universidade Nasionál Timor Lorosa’e, João Soares Martins, hateten iha aniversáriu ba dahuluk loron tais nian katak Universidade Nasionál Timor Lorosa’e (UNTL) iha responsabilidade boot atu salvaguarda tais timor ne’ebé hetan ona rekoñesimentu hosi UNESCO.
Tanba ne’e UNTL iha ona preparasaun ida liuhosi prosesu harii fakuldade turizmu no arte iha 2023.
“Ita-nia intensaun hakarak kria tán fakuldade turizmu no arte ne’e atu promove siénsia no peskiza iha area kultura no arte nian inklui mós hakarak halo mós estudu ida kle’an liu ba kultura timoroan nian hahú hosi Lospalos ba to’o Bobonaru no Oé-cusse tanba ida-idak iha ninia karaterístika espesifika ne’ebé presiza atu hatene tanba ida-ne’e serbisu boot ida mai UNTL,” João Martins hateten iha Sentru Konvensaun Dili, tersa ne’e.
Reitór João husu ba VIII governu konstitusionál liuhosi ministériu relevante atu fó apoia másimu atu mehi UNTL nian ne’e bele sai realidade iha 2023 hodi nune’e bele loke dalan ba joven sira bele estuda maka’as liután atu koñese valór hosi tais ne’e rasik.
“Nune’e ita bele fó oportunidade ba joven sira atu estuda no peskiza hodi koñese kle’an liu ita-nia tais nu’udar patrimóniu estadu,” nia tenik.
Nia husu responsabilidade mós ba jerasaun foin sa’e sira atu labele moe promove tais nu‘udar identidade timor nian.
Maibé tais timor ne’e maka hetan tiha rekoñesimentu hosi UNESCO depois ema timoroan rasik la promove filafali no rai de’it iha armáriu laran, konserteza ema hosi rai li’ur sei la hatene tais timor no sei la atrai turista sira atu sosa tais timor.
“Tanba ne’e ha’u husu ba ita hotu, liuliu ba jerasaun foin sa’e sira atu labele gosta hatais de’it roupa hosi rai-li’ur hanesan Indonézia, Bali, Amérika no Eropa nian,” nia katak.
Reitór UNTL ne’e agradese ba VIII governu konstitusionál ne’ebé halo ona esforsu maka tebes hodi lori ona Tais Timor tama iha mundu.
Notísia relevante: Ministru Longuinhos husu IESPP hotu atu apoiu prosesu salvaguarda tais TL
Jornalista: Tomé Amado
Editór: Evaristo Soares Martins
