ESGP sei deside kritéria estabelese eskola sekundáriu paralelu iha Covalima
COVALIMA, 13 dezembru 2022 (TATOLI)–Diretór Eskola Eekundáriu Geral Públika (EGP, Sigla portugés) Covalima, Francelino Freitas Carvalho, hateten ESGP Suai sei realiza enkontru ho inan-aman sira deside hamutuk hodi hasai kritériu estabelese eskola sekundáriu parelelu iha munisípiu Covalima.
“Iha loron 05 fulan-janeiru tinan 2023, eskola sei konvida inan-aman sira mai atu fó sai kritériu ba estabelese eskola sekundáriu parelelu hanesan atu deside valór osan propina fó inan-aman ne’e. Karik presiza atu rekruta profesór tuir nesesidade eskola maibé agora eskola sei halo planu,” Diretór ESGP Covalima, Francelino Freitas Carvalho, informa ba Agência Tatoli, tersa ne’e.
Eskola presiza halo enkontru ho inan-aman sira tanba atu aprezenta planu no kritéria estabelese eskola paralelu ne’e inan-aman konkorda ka lae, nune’e eskola bele deside hamutuk ho inan-aman.
“Ami halo enkontru ne’e, planu no kritériu ne’ebé mak iha, ami sei aprezenta ba estudante sira-nia inan-aman konkorda ka lae,” nia informa.
Kritériu ne’ebé eskola kria presiza aprezenta ba inan-aman sira hanesan presiza rekursu umanu no mós deside osan propina tanba bazea ba lei edukasaun eskola sekundáriu labele gratuita.
“Kritériu mak hanesan presiza rekursu importante responsavé ne’ebé ita atu koloka liu-liu osan propina ita-boot sira hatene ensinu sekundáriu jerál ho TEKVOC la’os eskola gratuitu. Tuir lei edukasaun ensinu báziku mak eskola gratuitu maibé eskola sekundáriu tuir nesesidade eskola haree presiza iha duni kontribuisaun hosi inan-aman,” nia hateten.
Eskola presiza rekursu umanu tenke halo rekrutamentu tuir nesesidade eskola presiza maibé eskola mós sei haree ba profesór dixiplina sa da mak presiza halo rekrutamentu.
“Ami atu foti rekursu iha ne’ebé hakarak lakohi fó espasu ba eskola halo rekrutamentu ba rekursu ne’ebé Covalima iha, bazea nesesidade hanesan profesór dixiplina saida mak presiza ami sei haree no tuur hamutuk hafoin loron 05 janeiru 2023 mak ami sei aprezenta ba inan-aman,” nia dehan.
Tanba, atu estabelese eskola sekundáriu paralelu presiza prenxe kritériu mak hanesan rekursu umanu, jestaun no infraestrutura.
Ho nune’e, bainhira rekursu umanu la sufisiente eskola sei rekomenda ba servisu edukasaun munisípiu Covalima atu halo rekrutamentu.
Antes ne’e, iha 16 novembru 2022, administadór munisípiu Covalima Francisco de Andrade hateten, Autoridade Covalima hato’o proposta ba Ministériu Edukasuan Juventude no Desportu (MEJD) atu estabelese eskola sekundáriu paralelu
Razaun autoridade haruka proposta ba MEJD tanba haree ba realiza ezame nasionál ne’e númeru estudante iha eskola sekundáriu jerál públika Suai barak liu entaun sala-de-aula la sufisiénte atu akumula no prosesu aprendizajen iha sala–de-aula ne’e alunus liu na’in-35.
Notísia Relevante: Autoridade Covalima husu ba MEJD atu konstrui eskola sekundária paralelu
Jornalista : Celestina Teles
Editór : Cancio Ximenes
