Família rendimentu $500 lasimu subsídiu $200 sei hatama ba kofre Estadu

DILI, 13 dezembru 2022 (TATOLI)—Koordenadór Jerál Sektretariadu Tékniku Pagamentu Subsídiu Fim do Ano ba Uma Kain, João Coimbra, hateten, família ne’ebé nia rendimentu ka saláriu mensal liu $500 sei la simu no osan ne’e sei hatama ba kofre Estadu.
Notísia Relevante: MSSI husu membru família saláriu liu $500 rezeita simu subsídiu $200
“Ema ne’ebé ho saláriu boot liu hanesan $500 ba leten, mak nia la mosu iha fatin pagamentu no la asina inklui la prense deklarasaun ne’ebé ami prepara ne’e, entaun tuir dekretu-lei 37/2022 hateten ema ne’ebé la mosu iha fatin pagamentu katak nia laiha ona direitu atu hetan no osan sei fila ba kofre Estadu,” Coimbra hateten, Agência Tatoli liuhusi telefónika, ohin.
Coimbra hatutan, kona-ba asuntu ida-ne’e kualker sé de’it sei laiha kompeténsia atu asina lista deklarasaun ema-ne’ebé la mosu iha fatin pagamentu.
“Tanba molok asina lista pagamentu, tenke aprezenta dokumentu hanesan fixa família, kartaun eleitoral, billete identidade, pasaporte inklui prenxe deklarasaun rendimentu, entaun bainhira ema la ba, automatikamente nia lista mamuk no osan tenke fila ba kofre Estadu,” nia esplika.
Tuir dadus finál ne’ebé Ministériu Administrasaun Estatál (MAE) envia ba MSSI ne’e iha totál benefisiáriu hamutuk 339,954 uma kain mak elizivél ba subsídiu ida-ne’e.
Jornalista : Osoria Marques
Editór : Cancio Ximenes

