iklan

DILI, POLÍTIKA, SEGURANSA

Horta ezije autoridade seguransa prosesa ajénsia bosok timoroan servisu iha rai-li’ur

Horta ezije autoridade seguransa prosesa ajénsia bosok timoroan servisu iha rai-li’ur

Prezidente Repúblika, José Ramos Horta. Imajen Tatoli /Egas Cristovão.

DILI, 13 dezembru 2022 (TATOLI)—Prezidente Repúblika (PR), José Ramos Horta, ezije ba autoridade polisiál prosesa ajénsia ilegál ne’ebé bosok joven timoroan atu ba serbisu iha rai-li’ur.

Notísia Relevante: TL-Portugál sei solusiona imigrante timoroan sira-nia problema ho dalan legál

“Ha’u haree autoridade polisiál sira to’o agora la rona buat ida kona-ba sira-ne’ebé grupu krime organizadu, bosok joven sira la halo buat ida ruma. To’o agora, ha’u ezije tiha ona relatóriu fulan hira ona nein rona kazu ida liu-hosi prokuradór jerál repúblika ba tribunál, entaun ema kontinua sai bosok sira, sira ba toba iha li’ur tanba osan laiha atu selu ótel. Agora ita sai ba toba iha Jardin, Governu Portugál ka Timor mak sala,” Xefe Estadu hateten ba jornalista sira liuhosi konferénsia imprensa iha aeroportu internasionál Nicolau Lobato hafoin hala’o vizita Estadu ba Singapura no vizita traballu ba Malázia, tersa ne’e.

Maske antes ne’e, Xefe Estadu hasoru malu ona ho nia omólogu Portugál hodi haree kestaun refere maibé situasaun ohin loron kontinua akontese joven timoroan balun kontinua toba iha jardin iha Portugál, tanba movimentasaun hosi Timor-Leste kontinua ba no daudaun situasaun klima iha Europa malirin (salju tun) nune’e defisíl tebes bainhira toba iha jardin.

“Ita ida-idak sai hosi Timor konforme ita hakarak Governu no ha’u rasik aviza dalabarak ona atu ba li’ur buka servisu hetan kontratu ba li’ur, agora ita sai arbiru la rona avizu hosi Governu,” nia dehan.

Nune’e, Xefe Estadu sei konkova fali reuniaun Konsellu Superiór Defeza Seguransa hodi haree situasaun oinsá atua krime organizadu sira-ne’ebé kontinua bosok timoroan sira.

“Hau sei konvoka fila-fali Konsellu Superiór Defeza Seguransa hodi rona informasaun husu órgaun sira-ne’ebé haree ba krime organizadu ne’ebé bosok ema tun sae, joven sira sai vítima. Mais informasaun barak loos, sé mak rona akompaña televizaun press mídia hateten kuidadu mais balun kontinua ema bosok, ida-ne’e krime organizadu,” nia hateten.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!