Top

PR Horta kontra saláriu désimu terseiru ba asesór sira

Prezidente Repúblika, José Ramos Horta. Imajen Tatoli/Antonio Daciparu.

DILI, 13 dezembru 2022 (TATOLI)—Prezidente Repúblika (PR), José Ramos Horta, hateten Xefe Estadu kontra saláriu désimu terseiru ba asesór sira-ne’ebé manán osan boot ($5000) maibé la’ós ba funsionáriu públiku no ajente administrasaun públika sira.

Notísia Relevante: Governu deside ajente administrasaun públika hetan pagamentu estraordináriu saláriu adisional

“Mídia balun ko’alia arbiru hateten Prezidente Repúblika promulga tiha ona no kontra saláriu désimu terseiru ne’e fake news. Ha’u to’o agora seidauk promulga buat ida. Ha’u kontra hanesan saláriu désimu terseiru ba asesór sira-ne’ebé manán osan boot. Mais entertantu ha’u halo konsulta ho Governu no konkluzaun mak ne’e, kapasitasaun sei defísil iha Timor laran tanba COVID-19, funu Úkrania folin aumenta dadus estatístika,” Xefe Estadune’e  klarifika ba jornalista sira liuhosi konferénsia impresa iha aeroportu internasionál Nicolau Lobato hafoin hala’o vizita Estadu ba Singapura no vizita traballu ba Malázia, tersa ne’e.

Xefe Estadu seidauk haree dekretu-lei kona-ba saláriu désimu terseiru ne’ebé Governu liuhosi reuniaun Konsellu Ministru (KM) aprova tanba foin mak nia fila mai Timor-Leste hafoin hala’o vizita estadu ba Singapura no Malázia.

“Ha’u seidauk haree lei ne’e. Ha’u foin mak fila no haree halo tiha konsulta rona mós Governu desizaun ne’ebé Governu hasai ne’e, hanoin ne’e di’ak la’ós perfeitu maibé akomoda interrese hotu,” nia dehan.

Horta hateten, désimu terseiru ko’alia ba-mai no hetan solusaun hanesan ekilibríu justu liu tanba balun manán de’it $600 no la signifika asesór ida manán $4000 ka $5000, nia atu hetan désimu terseiru ne’e la’ós.

Loloos, nia hateten, atu fó mós ba asesór estranjeiru sira tanba loloos iha rai hotu-hotu lei traballu la bele diskrimina bainhira ema ne’e serbisu iha fatin ida.

“Depois sira estranjeiru sira iha Timor-Leste sira-nia despeza barak liután, tanba ita hotu iha uma maibé sira aluga uma sempre karun. Tanba ne’e haree mós atu hetan ekilibríu ida justu,” nia hateten.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!